సీడబ్ల్యూసీ శాశ్వతసభ్యుడు గురుదీప్‌సింగ్‌ సప్పల్‌ ఆరోపణ

హైదరాబాద్‌, న్యూస్‌టుడే: ఆరెస్సెస్‌, భాజపాల ఎజెండా ఒకటేనని.. వాటికి రిజర్వేషన్లు ఇష్టం ఉండవని సీడబ్ల్యూసీ శాశ్వత సభ్యుడు గురుదీప్‌ సింగ్‌ సప్పల్‌ విమర్శించారు. అంబేడ్కర్‌ రాజ్యాంగాన్ని రద్దు చేసి.. మనుస్మృతిని అమలు చేసేందుకు ప్రయత్నిస్తున్నారని ఆరోపించారు. పీసీసీ ప్రచార కమిటీ ఛైౖర్మన్‌ మధుయాస్కీగౌడ్‌, ఏఐసీసీ అధికార ప్రతినిధి సుజాతాపాల్‌, పీసీసీ మీడియా కమిటీ ఛైర్మన్‌ సామ రాంమోహన్‌రెడ్డిలతో కలిసి ఆయన మంగళవారం గాంధీభవన్‌లో విలేకరుల సమావేశంలో మాట్లాడారు. ‘భాజపా 400 ఎంపీ సీట్లు గెలిస్తే రాజ్యాంగాన్ని రద్దు చేయాలని చూస్తోంది. ఆరెస్సెస్‌ శ్వేతపత్రంలో.. రాజ్యాంగం హిందూ వ్యతిరేకంగా ఉందని, దాన్ని మార్చాలని రాసి ఉంది. అందరికీ సమాన హక్కులు ఉండటం ఆరెస్సెస్‌కు నచ్చదు. దేశంలో 30 లక్షల కేంద్ర ప్రభుత్వ ఉద్యోగాలు ఖాళీగా ఉన్నాయి. వాటిని భర్తీ చేస్తే రిజర్వేషన్లు అమలు చేయాల్సి వస్తుందని నియామకాలు చేపట్టడం లేదు. అందుకే ప్రభుత్వ సంస్థలను ఒక్కొక్కటిగా ప్రైవేటుపరం చేస్తోంది. ప్రపంచంలో రెండో అతిపెద్ద ఆర్మీని కూడా ప్రధాని మోదీ నిర్వీర్యం చేశారు. సుప్రీంకోర్టు తీర్పు ప్రకారం రిజర్వేషన్లు పెంచాలంటే కులాల లెక్కలు తప్పకుండా కావాలి. ఇందుకోసం ఒక కమిషన్‌ నియమించాలని కోర్టు చెప్పినా మోదీ కుట్రపూరితంగా అమలు చేయలేదు. కాంగ్రెస్‌ అధికారంలోకి రాగానే కులగణన చేపట్టి ఆ మేరకు రిజర్వేషన్లు పెంచుతాం’ అని పేర్కొన్నారు.