కాంగ్రెస్‌ ఫిర్యాదు

హైదరాబాద్‌, న్యూస్‌టుడే: మెదక్‌ జిల్లా అల్లాదుర్గంలో మంగళవారం జరిగిన ఎన్నికల ప్రచార సభలో ప్రధాని మోదీ ఎన్నికల కోడ్‌ ఉల్లంఘించారని కాంగ్రెస్‌ పార్టీ ఆరోపించింది. ఆయనపై చర్యలు తీసుకోవాలని కోరుతూ కేంద్ర ఎన్నికల ప్రధాన కమిషనర్‌ రాజీవ్‌ కుమార్‌కు మంగళవారం పీసీసీ సీనియర్‌ ఉపాధ్యక్షుడు జి.నిరంజన్‌ లేఖ రాశారు. ప్రధాని ప్రసంగం ప్రజల మధ్య కుల, మత విభేదాలు సృష్టించేలా ఉందని ఆక్షేపించారు. దీనిపై మెదక్‌ జిల్లా ఎన్నికల అధికారి నుండి నివేదిక కోరి మోదీపై చర్యలు తీసుకోవాలన్నారు. లేకుంటే అది దేశంలో అరాచకానికి దారి తీస్తుందని నిరంజన్‌ పేర్కొన్నారు.