మొఘల్‌పురా, న్యూస్‌టుడే: ఎన్నికల నిబంధనలను అతిక్రమించి పిల్లలను ఎన్నికల ప్రచారంలో భాగస్వాములను చేసినందుకు కేంద్ర హోంమంత్రి అమిత్‌షాతో పాటు మరో నలుగురు భాజపా నేతలపై మొఘల్‌పురా పోలీసులు కేసు నమోదు చేశారు. పోలీసుల కథనం ప్రకారం.. ఈనెల ఒకటో తేదీ రాత్రి లాల్‌దర్వాజా మహంకాళి దేవాలయం నుంచి సుధా థియేటర్‌ సమీపంలోని లైబ్రరీ వరకు జరిగిన భాజపా రోడ్‌షోలో అమిత్‌షా పాల్గొన్నారు. లైబ్రరీ వద్ద ఏర్పాటు చేసిన సభావేదికపై అమిత్‌షా, హైదరాబాద్‌ భాజపా ఎంపీ అభ్యర్థి మాధవీలత, రాష్ట్ర భాజపా అధ్యక్షుడు జి.కిషన్‌రెడ్డి, ఎమ్మెల్యే రాజాసింగ్‌తో పాటు పార్టీ నాయకుడు యమన్‌సింగ్‌లు పార్టీ గుర్తును ప్రదర్శించిన కొందరు పిల్లలతో కలిసి నిబంధనలకు విరుద్ధంగా ప్రచారం నిర్వహించినట్లు టీపీసీసీ సీనియర్‌ ఉపాధ్యక్షుడు జి.నిరంజన్‌ మెయిల్‌ ద్వారా తెలంగాణ ఎన్నికల ప్రధానాధికారి వికాస్‌రాజ్‌కు గురువారం ఫిర్యాదు చేశారు. ఎన్నికల కమిషన్‌ ఆదేశాల మేరకు మొఘల్‌పురా పోలీసులు కేంద్ర హోంమంత్రి అమిత్‌షాతో పాటు కార్యక్రమంలో పాల్గొన్నవారిపై కేసు నమోదు చేసి దర్యాప్తు చేస్తున్నారు.