హైదరాబాద్‌, న్యూస్‌టుడే: ఇటీవల కాంగ్రెస్‌లో చేరిన ఆదిలాబాద్‌ జిల్లా నాయకుల చేరికలు తాత్కాలికంగా నిలిపివేసినట్లు పీసీసీ చేరికల కమిటీ సభ్యుడు, కార్యనిర్వాహక అధ్యక్షుడు జగ్గారెడ్డి శుక్రవారం ఓ ప్రకటనలో తెలిపారు. గతేడాది నవంబరులో జరిగిన అసెంబ్లీ ఎన్నికల సమయంలో తమకు కాకుండా కొత్తగా పార్టీలో చేరిన ఎన్నారై కంది శ్రీనివాస్‌రెడ్డికి టికెట్‌ ఇవ్వడంతో ఆ సమయంలో ఆదిలాబాద్‌ డీసీసీ అధ్యక్షుడిగా పని చేస్తున్న సాజిద్‌ఖాన్‌, పీసీసీ ప్రధాన కార్యదర్శి గండ్రత్‌ సుజాత, సీనియర్‌ నాయకులు సంజీవరెడ్డిలు పార్టీకి రాజీనామా చేశారు. పార్టీలోకి రావాలని ఆసక్తి చూపే వారిని చేర్చుకోవాలని కాంగ్రెస్‌ అధిష్ఠానం ఇటీవల ఆదేశించింది. దీంతో వీరు ముగ్గురు గత నెల 30న గాంధీభవన్‌లో కాంగ్రెస్‌లో చేరారు. వీరి చేరికలను కంది శ్రీనివాస్‌రెడ్డి వర్గం వ్యతిరేకిస్తూ నిరసనలకూ దిగింది. పరిస్థితి తీవ్రతను గుర్తించి వారి చేరికలను తాత్కాలికంగా నిలిపివేయాలని దీపా దాస్‌మున్షీ ఆదేశించినట్లు జగ్గారెడ్డి పేర్కొన్నారు.