ఖైరతాబాద్‌, న్యూస్‌టుడే: కేంద్రంలో పదేళ్ల భాజపా పాలనలో బీసీలకు తీరని అన్యాయం జరిగిందని బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్‌గౌడ్‌ ఆరోపించారు. లోక్‌సభ ఎన్నికల్లో ఓబీసీలు కోరుకుంటున్న అంశాలే ప్రధాన ఎజెండాగా ముందుకు వెళ్తున్న కాంగ్రెస్‌ నేతృత్వంలోని ‘ఇండియా’ కూటమికి బీసీల మద్దతు ఉంటుందని ప్రకటించారు. ఆదివారం హైదరాబాద్‌ లక్డీకాపూల్‌లోని ఓ హోటల్‌లో రాష్ట్రంలోని అన్ని జిల్లాల నుంచి తరలివచ్చిన బీసీ నాయకులతో ‘బీసీల రాజకీయ మేధోమథనం’ పేరిట సమావేశం నిర్వహించారు. ఈ సందర్భంగా ఆయన మాట్లాడుతూ.. దేశంలో తొలిసారి ఓబీసీ ప్రధానిగా ఉండటంతో సమస్యలన్నీ తీరుతాయనుకుంటే తీవ్ర నిర్లక్ష్యం చేశారన్నారు. కాంగ్రెస్‌ నేతృత్వంలోని ఇండియా కూటమి కేంద్రంలో అధికారంలోకి వస్తే తొలి సంతకం సామాజిక ఆర్థిక సమగ్ర కులగణన అంశంపైనే ఉంటుందని ప్రకటించడంతో పాటు ఇతర హామీలు మ్యానిఫెస్టోలో చేర్చినందున బీసీలంతా అండగా నిలవాలన్నారు. బైరి రవికృష్ణ, కుల్కచర్ల శ్రీనివాస్‌ ముదిరాజు, విశ్రాంత ఐఏఎస్‌ అధికారి డా.చిరంజీవులు, చిన్న శ్రీశైలంయాదవ్‌ తదితరులు పాల్గొన్నారు.