ఈనాడు, హైదరాబాద్‌: రాష్ట్రంలో లోక్‌సభ ఎన్నికల సందర్భంగా పోస్టల్‌బ్యాలెట్‌ ద్వారా శనివారం రాత్రివరకు 32,331 మంది ఓటు హక్కు వినియోగించుకున్నారు. ఇందులో దివ్యాంగులు, 80ఏళ్లు దాటిన వృద్ధులు 23,247 మంది ఉండగా..అందులో 15,637 మంది హోంకేటగిరీలో ఓటు వేశారు.

పోస్టల్‌ బ్యాలెట్‌ చిత్రాలు బహిర్గతం.. ముగ్గురిపై కేసు

వీర్నపల్లి, న్యూస్‌టుడే: ఎన్నికల ప్రవర్తన నియమావళికి విరుద్ధంగా పోస్టల్‌ బ్యాలెట్‌ పత్రం చిత్రాలను బహిర్గతం చేసిన సీఆర్పీఎఫ్‌ జవాన్‌తో పాటు మరో ఇద్దరిపై కేసు నమోదు చేసినట్లు వీర్నపల్లి ఎస్సై రమేశ్‌ ఆదివారం రాత్రి తెలిపారు. దిల్లీలో పనిచేస్తున్న రాజన్న సిరిసిల్ల జిల్లా వీర్నపల్లి మండలం రంగంపేటకు చెందిన జవాన్‌ పార్లమెంటు ఎన్నికల్లో పోస్టల్‌ బ్యాలెట్‌ ద్వారా ఓటు హక్కు వినియోగించుకుని.. ఆ చిత్రాలను ఇతరులకు పంపారని చెప్పారు. వాటిని ఎర్రగడ్డ తండాకు చెందిన భానోత్‌ శ్రీనివాస్‌, వాయిని సాయిలు సామాజిక మాధ్యమాల్లో వైరల్‌ చేశారన్నారు. ఎన్నికల ఫ్లయింగ్‌ స్క్వాడ్‌ ఇన్‌ఛార్జి వెంకన్న ఫిర్యాదు మేరకు ముగ్గురిపై కేసు నమోదు చేసినట్లు ఎస్సై వెల్లడించారు.