బీజేవైఎం జాతీయ అధ్యక్షుడు తేజస్వీ సూర్య

మారేడుపల్లి, బర్కత్‌పుర, నారాయణగూడ, న్యూస్‌టుడే: రిజర్వేషన్ల విషయంలో మార్ఫింగ్‌ వీడియోలతో భాజపాను అభాసుపాలు చేయాలని కొంతమంది చూస్తున్నారని.. అలాంటి వారికి ఓట్ల రూపంలో ప్రజలే గుణపాఠం చెబుతారు అని బీజేవైఎం జాతీయ అధ్యక్షుడు, ఎంపీ తేజస్వీ సూర్య అన్నారు. ఈ నకిలీ వీడియోల వెనక సీఎం రేవంత్‌రెడ్డి ఉన్నారని ఆరోపించారు. ఇలాంటి వారిని చట్టం ఎప్పటికైనా శిక్షిస్తుందన్నారు. తేజస్వీ సూర్య మంగళవారం హైదరాబాద్‌ మహేంద్రహిల్స్‌లో బీజేవైఎం అధికార ప్రతినిధి మల్క యశస్వి ఆధ్వర్యంలో ఏర్పాటు చేసిన మేధావుల సదస్సుకు ముఖ్య అతిథిగా హాజరై ప్రసంగించారు. ఎన్డీయే అధికారంలోకి వస్తే రాజ్యాంగం మారుస్తారని, రిజర్వేషన్లు రద్దు చేస్తారంటూ కాంగ్రెస్‌ నాయకులు ప్రజలను తప్పుదోవ పట్టిస్తున్నారని ఆగ్రహం వ్యక్తం చేశారు. కర్ణాటకలో ప్రజ్వల్‌ రేవణ్ణ తప్పు చేస్తే చట్ట ప్రకారం చర్యలు తప్పవని స్పష్టం చేశారు. వీబీ ఫౌండేషన్‌ ఆధ్వర్యంలో నారాయణగూడలోని కేశవ స్మారక విద్యా సంస్థల ప్రాంగణంలో ‘ఓటు ప్రచారం.. సంగీత కచేరీ’ ప్రత్యేక కార్యక్రమానికి హాజరయ్యారు. యువతతో ఓటు హక్కుపై ప్రతిజ్ఞ చేయించారు.