ఈనాడు, హైదరాబాద్‌: వేములవాడకు వచ్చిన ప్రధాని మోదీ రాజన్న సాక్షిగా అబద్ధాలు చెప్పారని మంత్రి పొన్నం ప్రభాకర్‌ ఆరోపించారు. దేశంలో ఏదో చేశాం అని చెబుతున్న భాజపా నేతలు కరీంనగర్‌కి ఏం చేశారంటే ఏమీ చెప్పట్లేదని ఆయన విమర్శించారు. ప్రధాని మోదీ ఈ జిల్లాకు వచ్చినా ఒక్క ముక్క కూడా కరీంనగర్‌ గురించి మాట్లాడే సాహసం చేయలేదని ఆయన బుధవారం మీడియాకు పంపిన ప్రకటనలో తెలిపారు. గత పదేళ్లలో రాజన్న ఆలయానికి నిధులు ఎందుకు ఇవ్వలేదని, ఆలయ అభివృద్ధికి ఎందుకు హమీ ఇవ్వలేదని పొన్నం ప్రశ్నించారు. రాజన్నకు కనీసం రూ.కోటి కాదు సంప్రదాయం ప్రకారం ఒక కోడె దూడనైనా దానం ఇచ్చారా అని ప్రశ్నించారు. ఎంపీ బండి సంజయ్‌ తల్లి లాంటి కరీంనగర్‌కు ఒక్క పనిచేయకపోగా చేనేతకు పన్నులు వేయించారని పొన్నం ఆరోపించారు.