హైదరాబాద్: ఆరు గ్యారంటీల పేరుతో ప్రజలను కాంగ్రెస్‌ మోసం చేసిందని, మాజీ మంత్రి హరీశ్‌రావు ఆరోపించారు. ఆరింటిలో ఐదు హామీలు అమలు చేసినట్లు ఆ పార్టీ నేతలు చెబుతున్నారని, అందంతా అబద్ధమని అన్నారు. బషీర్‌బాగ్‌లో నిర్వహించిన మీట్‌ ది ప్రెస్‌ కార్యక్రమంలో ఆయన మాట్లాడారు. రైతులకు ఇచ్చిన ఒక్క హామీని కూడా ఈ ప్రభుత్వం నిలబెట్టుకోలేదని ఆరోపించారు. కాంగ్రెస్‌ పార్టీ ఇచ్చిన బాండ్‌ పేపర్‌ బౌన్స్‌ అయ్యిందన్న ఆయన.. ఆ పార్టీని ఈ ఎన్నికల్లో శిక్షించాల్సిన అవసరం ఉందన్నారు. 

సీఎం హోదాలో రేవంత్‌రెడ్డి చేస్తున్న వ్యాఖ్యలు రాష్ట్రం పరువు తీస్తున్నాయని విమర్శించారు. ఆయన మాటల్లో పగ, ప్రతీకారమే కనిపిస్తోందని వ్యాఖ్యానించారు.‘‘ భారాస హయాంలో పంటకు పెట్టుబడి సహాయాన్ని సకాలంలో అందించాం. కానీ, ఇప్పుడు పంట చేతికొచ్చినా, పెట్టుబడి సాయం మాత్రం రైతులకు అందడం లేదు. కేసీఆర్‌ ముఖ్యమంత్రిగా ఉన్నప్పుడు దాదాపు 80 శాతం ప్రసవాలు ప్రభుత్వ ఆస్పత్రుల్లోనే జరిగేవి. కానీ, ప్రస్తుత ప్రభుత్వంపై నమ్మకం లేకపోవడంతో చాలా మంది ప్రైవేటు ఆస్పత్రులకే మొగ్గు చూపుతున్నారు. గతంలో నీటి కొరత, కరెంట్‌ కోత అనే పదాలే వినిపించేవి కాదు. నీటి కష్టాలు, కరెంట్‌ కోతలు అప్పుడే మొదలయ్యాయి’’ అని హరీశ్‌ విమర్శించారు.