హైదరాబాద్‌: ఇండియా కూటమిలో కేసీఆర్‌ను చేర్చుకునేది లేదని సీఎం రేవంత్‌రెడ్డి స్పష్టం చేశారు. చేవెళ్ల లోక్‌సభ కాంగ్రెస్‌ అభ్యర్థి రంజిత్‌రెడ్డికి మద్ధతుగా మంగళవారం రాత్రి బడంగ్‌పేటలో నిర్వహించిన రోడ్‌ షోలో సీఎం ప్రసంగించారు. భారాస హయాంలో కాంగ్రెస్‌ కార్యకర్తలపై అక్రమ కేసులు పెట్టినా తట్టుకుని నిలబడి ఇందిరమ్మ రాజ్యం తెచ్చారని కొనియాడారు. భారాస కారు కార్ఖానాకు పోయింది.. ఇక తిరిగి రాదు తూకానికి వేయాల్సిందేనని ఎద్దేవా చేశారు. డిసెంబరులో జరిగిన సెమీఫైనల్స్‌లో భారాసను ఓడించి ఫైనల్స్‌కు వచ్చామని, ఫైనల్స్‌లో భాజపాను ఓడించి రాహుల్‌ గాంధీని ప్రధానిని చేయాలని పార్టీ శ్రేణులకు పిలుపునిచ్చారు. 

‘‘కేంద్రంలో వచ్చేది సంకీర్ణ ప్రభుత్వమే.. 12 ఎంపీ సీట్లు గెలిస్తే నామా నాగేశ్వరరావు కేంద్ర మంత్రి అవుతారని కేసీఆర్‌ చెబుతున్నారు. ఎవరి చెవిలో పువ్వు పెడతారు? ఇండియా కూటమి నేతలు.. కారును దగ్గరకు కూడా రానీయరు. తెలంగాణలో 14 ఎంపీ సీట్లు గెలిచి.. రాహుల్‌ గాంధీని ప్రధానిని చేయబోతున్నాం. భాజపాతో కేసీఆర్‌ చీకటి ఒప్పందం చేసుకున్నారు. కేసీఆర్‌ ఏం చేశారో చెప్పకుండా.. మనం ఏం చేయట్లేదని అంటున్నారు. కేసీఆర్‌ జీవితంలో పదవి అనేది ఇక లేదు. సబితా ఇంద్రారెడ్డి ఉదయం కారు గుర్తు అంటున్నారు.. సాయంత్రం కమలం గుర్తు అంటున్నారు. హైదరాబాద్‌కు ఐటీఐఆర్‌ను ప్రధాని మోదీ రద్దు చేస్తే.. వద్దని కొండా విశ్వేశ్వర్‌రెడ్డి ఎందుకు చెప్పలేదు?’’ అని రేవంత్‌ ప్రశ్నించారు.