Vivek Express: వందే భారత్‌ సరే.. వివేక్‌ ఎక్స్‌ప్రెస్‌ గురించి తెలుసా?

(image source: Twitter)

దూర ప్రాంతాలకు అతి తక్కువ సమయంలోనే చేరుకోవడానికి భారత ప్రభుత్వం ‘వందే భారత్‌ ఎక్స్‌ప్రెస్‌’ (Vande Bharat Express) రైళ్లను ప్రవేశపెట్టింది. తాజాగా సికింద్రాబాద్‌ నుంచి విశాఖపట్నం మధ్య ఈ రైలును ప్రారంభించింది. సాధారణ రైళ్లలో 12 నుంచి 14 గంటల సమయం పడితే.. వందే భారత్‌లో కేవలం 8 గంటలే పడుతుంది. కానీ, 4 రోజుల ప్రయాణమున్న వివేక్‌ రైలు (Vivek Express) గురించి ఎప్పుడైనా విన్నారా? అయితే, తెలుసుకుందాం పదండి..

వివేక్‌ ఎక్స్‌ప్రెస్‌.. భారతీయ రైల్వేలో (Indian Railways) అత్యంత సుదీర్ఘ ప్రయాణం చేసే రైలు. అస్సాంలోని డిబ్రుఘడ్‌ - తమిళనాడులోని కన్యాకుమారి మధ్య ఈ రైలు రాకపోకలు సాగిస్తుంటుంది. ఈ రెండు రైల్వే స్టేషన్ల మధ్య దూరం 4,218 కిలోమీటర్లు. ప్రతి శనివారం.. డిబ్రుఘడ్‌ నుంచి మొదలై.. సుమారు 80 గంటలు (మొత్తం నాలుగు రోజులు) ప్రయాణించి గమ్యస్థానాన్ని చేరుకుంటుంది.

ఈ రైలు అస్సాం, నాగాలాండ్‌, పశ్చిమ బెంగాల్‌, ఆంధ్రప్రదేశ్‌సహా ఎనిమిది రాష్ట్రాలగుండా ప్రయాణిస్తుంది. దాదాపు 58 రైల్వేస్టేషన్లలో ఈ రైలు ఆగుతుంది. ఈ రైలులో ఇంజిన్‌తోపాటు 3 జనరల్‌ కోచ్‌లు, 11 స్లీపర్‌ కోచ్‌లు, నాలుగు 3టైర్‌ ఏసీ కోచ్‌లు, ఒక 2టైర్‌ ఏసీ కోచ్‌, ఒక ప్యాంట్రీ ఉన్నాయి.

ఈ రైలు గురించి 2011-12 రైల్వే బడ్జెట్‌లో అప్పటి రైల్వేశాఖ మంత్రి మమతా బెనర్జీ ప్రకటన చేశారు. 2013లో స్వామి వివేకానంద 150 జయంతి సందర్భంగా జనవరి 12న ఈ రైళ్లను పచ్చాజెండా ఊపి ప్రారంభించారు. నిర్విరామంగా రాకపోకలు సాగిస్తున్న ఈ రైలు సర్వీసుకు కరోనా సమయంలో బ్రేక్‌ పడింది. కరోనా (Corona).. లాక్‌డౌన్‌ నేపథ్యంలో రైల్వేశాఖ అన్ని రైళ్ల సర్వీసులను నిలిపివేసింది. అలా నిలిచిపోయిన ఆఖరి రైలు వివేక్‌ ఎక్స్‌ప్రెసే.

ఇక ప్రపంచంలోనే అత్యంత సుదీర్ఘ ప్రయాణమున్న రైలు ట్రాన్స్‌-సైబీరియన్‌ ఎక్స్‌ప్రెస్‌. పశ్చిమ రష్యాలోని మాస్కో నుంచి తూర్పు రష్యాలో ఉన్న వ్లాడ్‌వోస్టాక్‌ వరకు ఈ రైలు రాకపోకలు సాగిస్తోంది. ఈ గమ్యస్థానాల మధ్య దూరం 9,250కి.మీ. ఇది వివేక్‌ ఎక్స్‌ ప్రెస్‌ ప్రయాణించే దూరానికి రెట్టింపు. ఈ ట్రాన్స్‌-సైబీరియన్‌ ఎక్స్‌ప్రెస్‌ రైలులో మాస్కో నుంచి వ్లాడ్‌వోస్టాక్‌ వెళ్లడానికి ఆరు రోజుల సమయం పడుతుంది.

- ఇంటర్నెట్‌ డెస్క్‌