‘గో కరోనా, కరోనా గో’.. కేంద్ర మంత్రికి కరోనా!

ముంబయి: రిపబ్లిక్‌ పార్టీ ఆఫ్‌ ఇండియా అధ్యక్షుడు, కేంద్రమంత్రి రామ్‌దాస్‌ అథవాలే మంగళవారం కరోనా వైరస్‌ బారిన పడ్డారు. తాజాగా నిర్వహించిన పరీక్షల్లో ఆయనకు కరోనా పాజిటివ్‌ వచ్చినట్లు అధికారులు వెల్లడించారు. దీంతో ఆయన్ను దక్షిణ ముంబయిలోని ఓ ప్రైవేటు ఆస్పత్రికి తరలించినట్లు తెలిపారు.  కాగా ఆయన సోమవారం తన పార్టీ(రిపబ్లిక్‌ పార్టీ ఆఫ్‌ ఇండియా)లోకి నటి పాయల్‌ ఘోష్‌ చేరిక కార్యక్రమంలో పాల్గొన్నారు. 

దేశంలో కరోనా వైరస్‌ మొదలైన సమయంలో మంత్రి అథవాలే విభిన్నమైన వ్యాఖ్యలతో వార్తల్లో నిలిచిన విషయం తెలిసిందే. కరోనాను ఆపేందుకు మంత్రం జపించాలని ఆయన చెప్పడం అప్పట్లో అందరినీ ఆశ్చర్యానికి గురిచేసింది. ముంబయిలోని గేట్‌వే ఆఫ్ ఇండియా వద్ద‘గో కరోనా, కరోనా గో’అనే మంత్రాన్ని ఆయన జపించడం సామాజిక మాధ్యమాల్లో  వైరల్‌ అయింది.