AP News District: ఏపీలో మరో కొత్త జిల్లా ఏర్పాటుకు ప్రభుత్వం కసరత్తు?

అమరావతి: ఏపీలో మరో కొత్త జిల్లా ఏర్పాటుకు రాష్ట్ర ప్రభుత్వం కసరత్తు చేస్తున్నట్లు తెలుస్తోంది. మంత్రి పేర్ని నాని చేసిన వ్యాఖ్యలు దీనికి బలం చేకూరుస్తున్నాయి. మచిలీపట్నంలో బాబూ జగ్జీవన్‌ రామ్‌ జయంతి వేడుకల్లో పాల్గొన్న మంత్రి.. కొత్త జిల్లా ఏర్పాటుపై మాట్లాడారు. రాష్ట్రంలో 26 జిల్లాలకు అదనంగా మరో జిల్లా ఏర్పాటయ్యే అవకాశముందని చెప్పారు. ఆదివాసీ ప్రాంతాలన్నీ ఒకే జిల్లాగా ఉండాలనేది సీఎం జగన్‌ ఆలోచనని తెలిపారు. రానున్న రోజుల్లో ఆదివాసీ ప్రాంతాలను కలిపి ఒకే జిల్లాగా ఏర్పాటు చేయాలని ప్రభుత్వం యోచిస్తోందని నాని చెప్పారు. పాలనను సులభతరం చేసేందుకు ఈ నిర్ణయం తీసుకోనున్నామన్నారు. 

ఇప్పటికే రంపచోడవరం కేంద్రంగా జిల్లా ఏర్పాటు చేయాలని నిరసనలు జరుగుతున్న సంగతి తెలిసిందే. ఈ నేపథ్యంలో రంపచోడవరం, పోలవరం ముంపు గ్రామాలతో కలిపి కొత్త జిల్లాను ఏర్పాటు చేసేందుకు ప్రభుత్వం కసరత్తు చేస్తున్నట్లు తెలుస్తోంది. మంత్రి పేర్ని నాని తాజా వ్యాఖ్యలు దీనికి బలం చేకూరుస్తున్నాయి.