Andhra News: మహిళలపై దాడుల్లో యూపీ, బిహార్‌ను మించిపోయిన ఏపీ: కేంద్రం

దిల్లీ: ఆంధ్రప్రదేశ్‌లో మహిళలపై అఘాయిత్యాలు ఏటా పెరుగుతున్నాయని కేంద్ర హోంశాఖ వెల్లడించింది. 2018 నుంచి పోల్చితే 2021 నాటికి ఏపీలో అత్యాచారాలు 22శాతం, దాడులు 15శాతం, మహిళల ఆత్మగౌరవానికి భంగం కలిగించే కేసులు 31శాతం పెరిగాయని కేంద్ర హోంశాఖ తెలిపింది. ఈ మేరకు లోక్‌సభలో సభ్యుడు అడిగిన ప్రశ్నకు కేంద్ర హోంశాఖ సహాయ మంత్రి అజయ్ మిశ్రా లిఖితపూర్వక సమాధానం ఇచ్చారు. ‘‘2018 నుంచి 2021 మధ్య కాలంలో ఏపీలో మహిళలపై 4,340 అత్యాచారాలు, 8,406 ఆత్మగౌరవానికి భంగం కలిగించే ఉదంతాలు, 18,883 సాధారణ దాడులు జరిగాయి. మహిళలపై జరుగుతున్న దాడుల్లో యూపీ, బిహార్‌ను ఏపీ మించిపోయింది. మహిళల ఆత్మగౌరవానికి భంగం కలిగించే కేసుల్లో ఆంధ్రప్రదేశ్‌ అగ్రభాగాన ఉంది’’ అని అజయ్ మిశ్రా వెల్లడించారు.