Viveka Murder Case: వైకాపా ఎంపీ అవినాష్‌రెడ్డికి మరోసారి సీబీఐ నోటీసులు

పులివెందుల: మాజీ మంత్రి వివేకానందరెడ్డి హత్య కేసు(Viveka Murder Case)లో ఆరోపణలు ఎదుర్కొంటున్న వైకాపా ఎంపీ వైఎస్‌ అవినాష్‌రెడ్డి(MP Avinash Reddy)కి మరోసారి సీబీఐ(CBI) నోటీసులు జారీ చేసింది. విచారణకు ఈనెల 6న హైదరాబాద్‌లోని సీబీఐ కార్యాలయానికి రావాలని నోటీసుల్లో పేర్కొంది. సీబీఐ అధికారులు శనివారం రాత్రి పులివెందులలోని ఎంపీ ఇంటికి వెళ్లి నోటీసులు అందజేశారు.

అయితే 6వ తేదీన విచారణకు రాలేనని ఎంపీ చెప్పగా.. కచ్చితంగా రావాల్సిందేనని సీబీఐ స్పష్టం చేసింది. ఇప్పటికే రెండుసార్లు సీబీఐ అధికారులు అవినాష్‌రెడ్డిని విచారించారు. జవవరి 28, ఫిబ్రవరి 24న విచారించిన అధికారులు.. వివేకా హత్యకు సంబంధించిన పలు అంశాలపై ఆరా తీశారు. 

ఎంపీ తండ్రికీ..

అవినాష్‌రెడ్డి తండ్రి భాస్కర్‌రెడ్డికి కూడా సీబీఐ అధికారులు నోటీసులు ఇచ్చారు. ఈనెల 6న కడపలో విచారణకు రావాలని ఆయనకు సూచించారు. ఈనెల 12న విచారణకు హాజరుకావాలని గతంలో కోరిన సీబీఐ అధికారులు.. తాజాగా వెళ్లి 6వ తేదీనే రావాలని చెప్పారు.