గంజాల్‌ టోల్‌ప్లాజా వద్ద హైడ్రామా

నిర్మల్‌: నిర్మల్‌ జిల్లాలోని గంజాల్‌ టోల్‌ప్లాజా వద్ద హైడ్రామా చోటుచేసుకుంది. కుంటాల పీఏసీఎస్‌ పరిధిలో గెలుపొందిన తెరాస రెబల్‌ అభ్యర్థిని కాంగ్రెస్‌ నేతలు తరలించే క్రమంలో గొడవకు దారి తీసింది. కుంటాల పీఏసీఎస్‌లో తెరాస, కాంగ్రెస్‌ మద్దతుదారులు చేరో 6 స్థానాల్లో విజయం సాధించారు. తెరాస గెలుపొందిన ఆరు స్థానాల్లో ఒక రెబల్‌ అభ్యర్థి కూడా ఉన్నాడు. తెరాస రెబల్‌ అభ్యర్థిని కాంగ్రెస్‌ కార్యకర్తలు వారి శిబిరానికి తరలిస్తున్నారంటూ తెరాస నేతలు పోలీసులకు ఫిర్యాదు చేశారు. గంజాల్‌ టోల్‌ప్లాజా వద్ద అభ్యర్థిని తరలిస్తున్న వాహనాన్ని పోలీసులు అడ్డుకున్నారు. దీంతో అక్కడ గందరగోళ వాతావరణం నెలకొంది. పోలీసులు, కాంగ్రెస్‌ నేతల మధ్య అక్కడ స్వల్ప వాగ్వాదం చోటుచేసుకుంది. ఆ అభ్యర్థి కాంగ్రెస్‌ పార్టీకి మద్దతు తెలపడంతో గొడవ సద్దుమణిగింది.