Anand Mahindra: దేశంలో అత్యంత సంపన్న వ్యక్తిగా ఎప్పుడవుతారు? ఆనంద్‌ మహీంద్రా రిప్లై ఇదే!

ముంబయి: సామాజిక మాధ్యమాల్లో ఎప్పుడూ యాక్టివ్‌గా ఉండే ఆనంద్‌ మహీంద్రా (Anand Mahindra).. స్ఫూర్తిదాయక కథనాలతో పాటు సమకాలీన సంఘటనలపై నిత్యం స్పందిస్తుంటారు. యూజర్లు వేసే ప్రశ్నలకు తనదైన శైలిలో సమాధానమిస్తూ అందర్నీ ఆకర్షిస్తుంటారు. ఈ క్రమంలో.. దేశంలోనే అత్యంత ధనవంతుల జాబితాలో (India's richest) మీరెప్పుడు నంబర్‌ 1 అవుతారని ఇటీవల ఓ యూజర్‌ అడిగిన ప్రశ్నకు ఆనంద్‌ మహీంద్రా తాజాగా స్పందించారు.

‘నిజమేంటంటే.. నేను ఎప్పటికీ అత్యంత సంపన్నుడిని కాలేను. ఎందుకంటే అది ఎప్పుడూ నా కోరిక కాదు’ అని ఆనంద్‌ మహీంద్రా స్పందించారు. దేశంలో అత్యంత సంపన్నుల జాబితా 2022ను ఫోర్బ్స్‌ ఇండియా (Forbes India) ఇటీవల విడుదల చేసింది. 2.1బిలియన్‌ డాలర్ల విలువైన ఆస్తులతో ఆనంద్‌ మహీంద్రా ఈ జాబితాలో 91స్థానంలో ఉన్నారు. దేశంలో తొలి వంద స్థానాల్లో నిలిచిన సంపన్నుల మొత్తం ఆస్తుల విలువ 800 బిలియన్‌ డాలర్లు. ఇక ట్విటర్‌లో ఆనంద్‌ మహీంద్రాకు కోటికి పైగా ఫాలోవర్లు ఉన్న సంగతి తెలిసిందే.