Madhya Pradesh: ప్రధాని మోదీపై వివాదాస్పద వ్యాఖ్యలు.. కాంగ్రెస్‌ నేత అరెస్ట్‌!

భోపాల్‌: ప్రధాని నరేంద్ర మోదీ(PM Modi)ని ఉద్దేశించి మధ్యప్రదేశ్‌(Madhya Pradesh) మాజీ మంత్రి, సీనియర్‌ కాంగ్రెస్‌ నేత రాజా పటేరియా(Raja Pateria) చేసిన వ్యాఖ్యలు తీవ్ర వివాదాస్పదమైన విషయం తెలిసిందే. ఈ క్రమంలోనే మంగళవారం ఉదయం ఆయన్ను పోలీసులు అరెస్టు చేశారు. దామోహ్‌ జిల్లా హట్టాలోని ఆయన ఇంటికి చేరుకున్న పోలీసులు ఈ మేరకు చర్యలు తీసుకున్నారు. అంతకుముందు మధ్యప్రదేశ్‌ హోంశాఖ మంత్రి నరోత్తమ్‌ మిశ్ర ఆదేశాల మేరకు ఇక్కడి పన్నా జిల్లాలోని పవయీ పోలీస్‌ స్టేషన్‌లో పటేరియాపై కేసు నమోదైంది.

ఇదిలా ఉండగా..  ‘‘రాజ్యాంగాన్ని, మైనార్టీలు, దళితుల భవిష్యత్తును కాపాడేందుకు మోదీని ‘చంపేందుకు’ సిద్ధం కావాలి. ‘చంపడం’ అంటే ఆయనను ఓడించడమని అర్థం’’ అని పటేరియా అన్నట్లు సోమవారం ఓ వీడియో సామాజిక మాధ్యమాల్లో వైరల్‌ అయింది. పవయీలో నిర్వహించిన కాంగ్రెస్‌ కార్యకర్తల సమావేశంలో ఆయన ఈ వ్యాఖ్యలు చేశారు. దీంతో ఇది కాస్త వివాదాస్పదంగా మారింది. అయితే, తన వ్యాఖ్యలను వక్రీకరించారని పటేరియా అన్నారు. మరోవైపు.. భాజపాతోపాటు కాంగ్రెస్‌ నాయకులూ ఆయన మాటలను ఖండించారు.