AI Express: ఎయిర్‌ ఇండియా ఎక్స్‌ప్రెస్‌ విమానం.. కరాచీలో ఎమర్జెన్సీ ల్యాండింగ్‌..!

దిల్లీ: దుబాయ్‌ నుంచి పంజాబ్‌లోని అమృత్‌సర్‌కు చేరుకోవాల్సిన ఓ ఎయిర్‌ ఇండియా ఎక్స్‌ప్రెస్‌ (Air India Express) విమానం అత్యవసర పరిస్థితుల్లో పాకిస్థాన్‌లోని కరాచీ (Karachi)లో ల్యాండ్‌ అయ్యింది. విమానంలో ఓ వ్యక్తి అస్వస్థతకు గురికావడమే దీనికి కారణమని విమానయాన సంస్థ ప్రతినిధులు తెలిపారు. శనివారమే ఈ ఘటన చోటుచేసుకోగా నేడు వెలుగులోకి వచ్చింది.

‘దుబాయ్- అమృత్‌సర్ విమానంలోని ఓ ప్రయాణికుడికి మార్గమధ్యలో అకస్మాత్తుగా వైద్యపరమైన సమస్యలు తలెత్తాయి. దీంతో వీలైనంత త్వరగా అతడికి వైద్య సాయం అందించేందుకుగానూ కరాచీ అత్యంత సమీపంలో ఉండటంతో విమానాన్ని అక్కడికి మళ్లించారు.  ల్యాండింగ్ అయిన వెంటనే సంబంధిత వ్యక్తికి వైద్య సేవలు అందించారు. అనంతరం విమానాశ్రయ వైద్య సిబ్బంది అతడికి ప్రయాణించడానికి అనుమతినిచ్చింది. దీంతో విమానం కరాచీ నుంచి అమృత్‌సర్‌కు చేరుకుంది’ అని విమానయాన ప్రతినిధులు తెలిపారు.