నాలుగేళ్ల కుమారుడి సాక్ష్యం.. హత్యకేసులో తండ్రికి జీవితఖైదు

ముంబయి: తన భార్యను అతి దారుణంగా చంపిన ఓ భర్తకు మహారాష్ట్రలోని ముంబయి (Mumbai) సెషన్స్‌ కోర్టు జీవితఖైదు (life sentence) విధించింది. తల్లి హత్యను కళ్లారా చూసిన నాలుగేళ్ల కుమారుడు చెప్పిన సాక్ష్యం ఆధారంగా కోర్టు ఆ తండ్రికి శిక్ష వేసింది. వివరాల్లోకి వెళితే..

ముంబయిలోని దాదర్‌ ప్రాంతానికి చెందిన ఉమేశ్‌ బొబలే ఓ డెంటిస్ట్‌. ఇతడికి 2009లో తనూజ అనే మహిళతో వివాహమైంది. వీరికి ఓ కుమారుడు ఉన్నాడు. అయితే ఆ తర్వాత భార్యాభర్తల మధ్య మనస్పర్థలు తలెత్తడంతో తనూజ తన భర్తపై గృహహింస కేసు పెట్టింది. తర్వాత భర్తకు దూరంగా తన పుట్టింటివారితో కలిసి నివసించేది.

ఈ క్రమంలోనే భార్యపై కోపం పెంచుకున్న ఉమేశ్.. 2016 డిసెంబరు 11న ఆమె ఉంటున్న ఇంటికి వచ్చి అతి కిరాతకంగా హత్యచేశాడు. 37 సార్లు కత్తితో పొడిచి చంపేశాడు. ఆ తర్వాత తనే పోలీసులకు ఫోన్‌ చేసి లొంగిపోయాడు. ఘటన జరిగిన సమయంలో ఉమేశ్ కుమారుడు ఇంట్లోనే ఉన్నాడు. అప్పటికి ఆ చిన్నారి వయసు నాలుగేళ్లు.

20 ఏళ్లలో తొలిసారి.. మహిళను ఉరితీయనున్న సింగపూర్‌

ఈ ఘటనపై కేసు నమోదు చేసిన పోలీసులు నిందితుడిని కోర్టులో హాజరుపర్చారు. అయితే, తన మానసిక పరిస్థితి సరిగా లేదని.. ఆ క్షణంలో ఏం చేస్తున్నానో కూడా తనకు తెలియలేదని నిందితుడు ఉమేశ్ న్యాయస్థానానికి తెలిపాడు. ఈ క్రమంలోనే ఈ కేసుపై సుదీర్ఘ విచారణ చేపట్టిన సెషన్స్‌ కోర్టు.. 10 మంది సాక్షుల వాంగ్మూలాలను పరిగణనలోకి తీసుకుంది. ఇందులో మృతురాలి కుమారుడితో పాటు ఆమె సోదరుడు, నిందితుడి బంధువు తదితరులున్నారు.

కేసు విచారణ సందర్భంగా 2020లో మృతురాలి కుమారుడిని కోర్టులో హాజరుపర్చగా ఆ చిన్నారి సాక్ష్యం చెప్పాడు. ‘‘ఆ రోజు రాత్రి నాన్న మా ఇంటికి వచ్చి అమ్మను కొట్టాడు. కత్తితో పొడిచి చంపాడు. నేను అరవలేదు కానీ, నా గుండెల్లో ఏదో దడగా అనిపించింది’’ అని ఆ బాలుడు కోర్టుకు వివరించాడు. సాక్ష్యాధారాలను పరిశీలించిన న్యాయస్థానం తాజాగా తీర్పు వెలువరించింది. కుమారుడు చెప్పిన సాక్ష్యం ఆధారంగా ఉమేశ్‌కు జీవిత ఖైదు విధిస్తున్నట్లు కోర్టు తీర్పు వెలువరించింది.