70 ఏళ్లొచ్చినా.. ఇంకా భర్తపై ఆరోపణలా..!

భార్య అప్పీల్‌ను తిరస్కరించిన దిల్లీ హైకోర్టు

దిల్లీ: భార్య క్రూరత్వానికి పాల్పడిందన్న కారణంతో భర్తకు విడాకులు మంజూరు చేస్తూ ఫ్యామిలీ కోర్టు ఇచ్చిన తీర్పును దిల్లీ హైకోర్టు సమర్థించింది. విడాకుల డిక్రీని రద్దు చేయాలని భార్య వేసిన అప్పీల్‌ను తిరస్కరించింది. ‘‘ఇందులో వాది ప్రతివాదులకు ఏడు పదుల వయసు దాటింది. ఈ వయసులో కూడా వాది (భార్య) ఈ వివాదానికి ముగింపు పలకకుండా ఆధారాల్లేని ఆరోపణలు చేస్తున్నారు. వ్యాజ్యాల మీద వ్యాజ్యాలు వేస్తున్నారు. ఆమె తీరు చూస్తే భర్తలో ఏ కొంత మంచితనాన్ని కూడా చూడడానికి ఇష్టపడటం లేదని అర్థమవుతోంది. 2013 నుంచి విడిగా ఉంటున్నా.. వివాదాన్ని పరిష్కరించుకోవడానికి ఆమె సుముఖంగా లేదు’’ అని న్యాయస్థానం పేర్కొంది. ఈ కేసులో వాది ప్రతివాదులకు 1973లో వివాహమైంది. ఇద్దరు పిల్లలు ఉన్నారు. పెళ్లైన 41 ఏళ్ల తర్వాత క్రూరత్వం కింద భర్త విడాకులు కోరారు. 2018లో ఫ్యామిలీ కోర్టు మంజూరుచేసింది.