అఫ్గాన్‌ పరిస్థితికి అమెరికాదే బాధ్యత

జర్మనీ ఛాన్సలర్‌ ఏంజెలా మెర్కెల్‌ సహచరుడు

బెర్లిన్‌: అఫ్గానిస్థాన్‌లో ప్రస్తుత పరిస్థితికి అమెరికాయే బాధ్యత వహించాలని జర్మనీ ఛాన్సలర్‌ ఏంజెలా మెర్కెల్‌ నాయకత్వం వహిస్తున్న సెంటర్‌-రైట్‌ యూనియన్‌ బ్లాక్‌లోని నాయకుడు మార్కస్‌ సోడ పేర్కొన్నారు. ‘‘అఫ్గాన్‌ నుంచి సేనలను ఉపసంహరించుకోవాలన్న నిర్ణయం అమెరికాయే తొందరపడి తీసుకుంది. కాబట్టి ఈ పరిస్థితికి ఆ దేశానిదే ప్రధాన బాధ్యత’’ అని తెలిపారు. శరణార్థుల విషయంలోనూ అగ్రరాజ్యం జాగ్రత్తలు తీసుకోవాలని, అఫ్గాన్‌ పొరుగు దేశాలకు సాయం చేయాలని కోరారు. 2015లో ఆసియా, ఆఫ్రికా నుంచి ఐరోపాకు శరణార్థులు వలస వచ్చారని, అలాంటి సంక్షోభం తలెత్తకుండా అమెరికా చూసుకోవాలని చెప్పారు.