Anand Mahindra: అచ్చం తనలాంటి వ్యక్తి.. మహీంద్రా రియాక్షన్‌ ఇదే..!

ఇంటర్నెట్‌ డెస్క్‌: ప్రముఖ పారిశ్రామికవేత్త ఆనంద్ మహీంద్రా ట్విటర్‌లో చురుగ్గా ఉంటారు. నెటిజన్లు చేసే పోస్టులకు తనదైన శైలిలో సరదాగా బదులిస్తుంటారు. తాజాగా తనను పోలిన వ్యక్తి గురించి ఓ నెటిజన్ చెప్పగా.. దానికి మహీంద్రా ఇచ్చిన సమాధానం ఆకట్టుకుంటోంది. 

ఓ నెటిజన్‌ మహీంద్రాను పోలి ఉన్నటువంటి వ్యక్తి ఫొటోను ట్విటర్‌లో షేర్ చేసి.. ‘ఈ వ్యక్తిని చూసిన తర్వాత మహీంద్రా కూడా షాక్‌ అవుతారు. అతడు నా సహోద్యోగి’ అని రాసుకొచ్చారు. దానికి మహీంద్రా ఫన్నీ సమాధానం ఇచ్చారు. ‘మా చిన్నతనంలో ఏదో మేళాలో మేం విడిపోయినట్టున్నాం’ అని వ్యాఖ్యానించారు. ఈ సంభాషణలపై నెటిజన్ల నుంచి వెంటనే స్పందన వచ్చింది. ‘ఏకరూప కవలలు’, ‘మీరిద్దరు కలుసుకోవాల్సిన సమయం ఇది’ అని పోస్టులు పెట్టారు.