Vande Bharat Express: అన్ని హంగులున్న ‘వందే భారత్‌’లో చెత్తా చెదారం

ఇంటర్నెట్‌డెస్క్‌: వందేభారత్‌ రైళ్లలో పరిశుభ్రత లోపిస్తోంది. బోగీల్లో ఎక్కడిక్కడ వదిలేసిన వాటర్‌ బాటిళ్లు, ఆహార పదార్థాలు, పాలిథీన్‌ కవర్లు దర్శనమిస్తున్నాయి.  ప్రజలకు సౌకర్యవంతమైన ప్రయాణ అనుభూతిని కలిగించేందుకు కేంద్రం తీసుకొచ్చిన ఈ సెమీ హైస్పీడ్‌ రైళ్లను పరిశుభ్రంగా ఉంచడంలో ప్రయాణికులు బాధ్యత మరిచి ప్రవర్తిస్తున్నారనే విమర్శలు వస్తున్నాయి. ఎక్కడ తీసిందో తెలియదు గానీ.. చెత్తాచెదారంతో నిండి ఉన్న వందేభారత్‌ ఎక్స్‌ప్రెస్‌ బోగీ ఫొటోను అవనిశ్‌ శరణ్‌ అనే ఐఏఎస్‌ అధికారి ట్విటర్‌లో పోస్టు చేశారు. ఓ పారిశుధ్య కార్మికుడు వాటిని చీపురుతో శుభ్రం చేస్తున్నట్లు అందులో కనిపిస్తోంది. ‘‘వుయ్‌ ద పీపుల్‌’’ అంటూ దానికి క్యాప్షన్‌ కూడా జత చేశారు. దీనిపై రకరకాల కామెంట్లు వెల్లువెత్తుతున్నాయి. 

‘‘భారత ప్రజలు హక్కుల కోసం మాత్రమే పోరాడుతారు, కానీ, తమ బాధ్యతలను విస్మరిస్తారు’’ అంటూ ఓ యూజర్‌ కామెంట్‌ చేశాడు. ప్రజలకు తక్కువ ఖర్చులో సౌకర్యవంతమైన ప్రయాణాన్ని కల్పించేందుకు వేల కోట్ల ఖర్చుతో ఈ వందే భారత్‌ రైళ్లను నడుపుతుంటే.. ప్రజలు మాత్రం వాటిని పరిశుభ్రంగా ఉంచకపోవడం చాలా విచారకరమంటూ మరో యూజర్‌ రాసుకొచ్చారు. ఇప్పటివరకు దేశ వ్యాప్తంగా 8 రూట్లలో వందేభారత్‌ రైళ్లు పరుగులు పెడుతున్నాయి. ఇటీవల తెలుగు రాష్ట్రాల ప్రజలకు సంక్రాంతి కానుకగా హైదరాబాద్‌-విశాఖపట్నం మధ్య ఈ సెమీ హైస్పీడ్‌ రైలును ప్రారంభించిన సంగతి తెలిసిందే.