Bollywood: వేసవిలో ‘జయేష్‌భాయ్‌’... నూతన ఏడాదికి ‘ఈద్‌ దీవాళి’

బాలీవుడ్‌లో ఒకేరోజు ఇద్దరు ప్రముఖ కథానాయకుల చిత్రాల విడుదల తేదీలు ప్రకటించారు. ఈ ఏడాది వేసవికి ‘జయేష్‌భాయ్‌ జోర్దార్‌’గా రణ్‌వీర్‌ సింగ్‌ వినోదాలు పంచనున్నారు. నూతన దర్శకుడు దివ్యాంగ్‌ ఠక్కర్‌ దర్శకత్వంలో హాస్య ప్రధానంగా తెరకెక్కుతున్న ఈ చిత్రంలో షాలినీ పాండే నాయిక. ఈ చిత్రాన్ని మే 13న విడుదల చేయనున్నట్లు చిత్రబృందం ప్రకటించింది. మరోవైపు అగ్ర కథానాయకుడు సల్మాన్‌ ఖాన్‌ త్వరలో ‘కభీ ఈద్‌ కభీ దీవాళి’ చిత్రాన్ని పట్టాలెక్కించనున్నారు. సల్మాన్‌కు జోడీగా పూజా హెగ్డే అలరించనుంది. ఫర్హాద్‌ సామ్‌జీ తెరకెక్కించనున్న ఈ సినిమాను సాజిద్‌ నడియాడ్‌వాలా నిర్మిస్తున్నారు. ఇంకా ఈ సినిమా సెట్స్‌పైకి వెళ్లకముందే విడుదల తేదీని ఖరారు చేశారు. వచ్చే ఏడాదికి నూతన సంవత్సర కానుకగా ఈ ఏడాది డిసెంబరు 30న ఈ చిత్రాన్ని ప్రేక్షకుల ముందుకు తీసుకురావాలని చిత్రబృందం తాజాగా నిర్ణయించింది. తమిళంలో ఘన విజయం సాధించిన ‘వీరం’ చిత్రానికి రీమేక్‌గా ఇది రూపొందుతున్నట్లు తెలుస్తోంది.