janhvi kapoor: మేమంత డబ్బున్నోళ్లం కాదు

‘ఇక్కడ ప్రతిభే కీలకం. అతిలోక సుందరి శ్రీదేవి కూతురనో, స్టార్‌ నిర్మాత బోనీ కపూర్‌ ముద్దుల తనయ కావడంతోనో ఎవరూ ఎర్ర తివాచీ పరచరు’ అంటోంది జాన్వీ కపూర్‌ (janhvi kapoor). ఇటీవల ఓ మీడియా సంస్థతో మనసు విప్పి చాలా విషయాలే మాట్లాడింది. ‘ఔను.. నాది సినిమా నేపథ్య కుటుంబం కావడంతోనే మొదటి అవకాశం తేలికగానే దక్కింది. నా గురించి మరింత తెలుసుకోవాలనే ఆరాటంతో రెండో అవకాశమూ ఇచ్చి ఉండొచ్చు. ఆ తర్వాత కథ మొత్తం మారిపోయింది. ఇప్పుడు నామీద, నా ప్రతిభ మీద నమ్మకం ఉంటేనే ఎవరైనా ఛాన్స్‌లు ఇస్తున్నారు. స్టార్‌ సంతానం అనే కారణంతో ఏ నిర్మాత నన్ను తన సినిమాలోకి తీసుకోరు. రూ.కోట్లకొద్దీ నష్టాలకు సిద్ధపడరు. ఆ నష్టాలు భరించేంత ధనవంతులం నేనూ కాదు.. మా నాన్నా కాదు’ అంటూ చెప్పుకొచ్చింది జాన్వీ. ప్రస్తుతం తను సర్వైవల్‌ డ్రామా ‘మిలీ’లో (Mili) నటిస్తోంది. ఇది మలయాళ చిత్రం ‘హెలెన్‌’ ఆధారంగా రూపొందుతోంది.