Bigg boss telugu 6: బిగ్‌బాస్‌ సీజన్‌-6.. నాగార్జున పారితోషికం భారీగా పెరిగిందా?

హైదరాబాద్‌: బుల్లితెర తెలుగు ప్రేక్షకులను అలరించిన రియాల్టీ షో ‘బిగ్‌బాస్‌’. త్వరలోనే ‘సీజన్‌6’ ప్రేక్షకుల ముందుకు రానుంది. ప్రస్తుతం బిగ్‌బాస్‌-6లో పాల్గొనే కంటెస్టెంట్‌ల ఎంపిక ప్రక్రియ మొదలైంది. మరోవైపు ప్రీపొడక్షన్‌ పనులు కూడా ప్రారంభమయ్యాయి. ఈ సారి కూడా అగ్ర నటుడు నాగార్జున వ్యాఖ్యాతగా వ్యవహరించనున్నారు. ఇప్పటికే సదరు టెలివిజన్ ఛానల్‌ ప్రచార కార్యక్రమాలను మొదలు పెట్టింది. ఈ నేపథ్యంలో ఓ ఆసక్తికర వార్త సామాజిక మాధ్యమాల్లో ట్రెండ్‌ అవుతోంది. సీజన్‌-6కు వ్యాఖ్యాతగా వ్యవహరిస్తున్న నాగార్జున పారితోషికం బాగా పెరిగినట్లు సమాచారం. ఈ సీజన్‌కోసం ఆయన రూ.15కోట్లు తీసుకుంటున్నారని టాక్‌.

బిగ్‌బాస్‌ సీజన్‌-6 సెప్టెంబరు 4 నుంచి టెలికాస్ట్‌ కానుంది.  ఈ సీజన్‌లో ఎంతమంది పాల్గొంటారు? ఎవరెవరు ఉంటారన్న విషయాలు తెలియాలంటే ఇంకొన్ని రోజులు ఆగాల్సిందే. మరోవైపు నాగార్జున సీజన్‌-5కు ఎపిసోడ్‌కు రూ.12లక్షలు తీసుకున్నట్లు సమాచారం. అంటే మొత్తం సీజన్‌కు రూ.12కోట్ల వరకూ డిస్నీ+హాట్‌స్టార్‌ చెల్లించింది. ఇప్పుడు సీజన్‌-6 రూ.15కోట్లకు చేరినట్లు తెలుస్తోంది. అదే సమయంలో సల్మాన్‌ఖాన్‌ హిందీలో బిగ్‌బాస్‌ సీజన్‌-15 కోసం రూ.350కోట్లు తీసుకుంటున్నారని టాక్‌.