Pushpa: ఇదేం రూమర్రా అయ్యా!

హైదరాబాద్‌: ‘తగ్గేదే లే’ అంటూ మాస్‌ లుక్‌తో పుష్పరాజ్‌గా ప్రేక్షకుల్ని అలరిస్తున్నారు ఐకాన్‌ స్టార్‌ అల్లు అర్జున్‌. ఆయన ప్రధాన పాత్రలో నటిస్తున్న చిత్రం ‘పుష్ప’. ప్రముఖ దర్శకుడు సుకుమార్‌ ఈ చిత్రాన్ని తెరకెక్కిస్తున్నారు. కాగా, తాజాగా ఈ చిత్రానికి సంబంధించిన ఓ వార్త నెటిజన్లను ఆశ్చర్యపరుస్తోంది. అదేమిటంటే.. ఈ చిత్రాన్ని రెండు భాగాలుగా విడుదల చేయనున్నారట. ఎర్రచందనం స్మగ్లింగ్‌ అనేది చాలా పెద్ద అంశం కావడంతో ఈ కథను మొదట సిరీస్‌ల రూపంలో ప్రేక్షకులకు అందించాలని సుకుమార్‌ భావించారని.. అనంతరం అదే కథను బన్నీతో సినిమాగా మలుస్తున్నారని ఎప్పటి నుంచో వార్తలు వస్తున్న విషయం తెలిసిందే.

ఈ నేపథ్యంలో తాజాగా ‘పుష్ప’ రిలీజ్‌ గురించి వార్తలు చక్కర్లు కొడుతున్నాయి. ఈ చిత్రాన్ని రెండు భాగాలుగా తెరకెక్కించాల్సిన అవసరం ఉందని సుకుమార్‌ భావించారట. అదే విషయాన్ని బన్నీతో చెప్పగా ఆయన కూడా ఓకే అన్నారట. దీంతో దేశంలో పరిస్థితులు కుదుటపడి, అన్ని అనుకున్నట్టే జరిగితే ఈ ఏడాదిలో ‘పుష్ప’ మొదటి భాగాన్ని విడుదల చేస్తారట. అలాగే వచ్చే ఏడాదిలో రెండో భాగాన్ని విడుదల చేసే అవకాశాలున్నాయని తెలుస్తోంది. ఈ వార్తలు చూసిన నెటిజన్లు.. ‘ఇదేంటబ్బా కొత్తగా’ అంటూ కామెంట్లు చేస్తున్నారు.

ప్రముఖ దర్శకుడు దేవిశ్రీ ప్రసాద్‌ ఈ చిత్రానికి స్వరాలు అందిస్తున్నారు. సుకుమార్‌-బన్నీ-దేవిశ్రీ ప్రసాద్‌ కాంబోలో రానున్న మూడో చిత్రమిది. రష్మిక కథానాయిక. మలయాళీ నటుడు ఫహద్‌ ఫాజిల్‌ ఇందులో ప్రతినాయకుడిగా కనిపించనున్నారు. ఇటీవల విడుదలైన ‘పుష్పరాజ్‌’ ఇంట్రో వీడియో అందర్నీ ఆకర్షించింది.