Varalakshmi: ‘మైఖేల్‌’ కోసం వరలక్ష్మి

సందీప్‌ కిషన్‌ కథానాయకుడిగా రంజిత్‌ జయకోడి తెరకెక్కిస్తున్న బహుభాషా చిత్రం ‘మైఖేల్‌’. భరత్‌ చౌదరి, పుస్కూర్‌ రామ్‌  మోహన్‌ రావు సంయుక్తంగా నిర్మిస్తున్నారు. దివ్యాంశ కౌశిక్‌ కథానాయిక. విజయ్‌ సేతుపతి ప్రధాన పాత్రలో నటిస్తున్నారు. ఈ చిత్రంలో నటి వరలక్ష్మీ శరత్‌ కుమార్‌ ఓ ముఖ్య పాత్ర పోషించనున్నారు. ఈ విషయాన్ని చిత్ర బృందం గురువారం అధికారికంగా ప్రకటించింది. ఆమె పాత్రకు సంబంధించిన వివరాలు త్వరలో వెల్లడిస్తామంది. ‘‘విభిన్నమైన యాక్షన్‌ కథాంశంతో ఈ సినిమా రూపొందుతోంది. స్క్రీన్‌ప్లే కొత్తగా ఉంటుంది. సందీప్‌ కిషన్‌ పాత్ర చాలా కొత్తగా ఇంటెన్సిటీతో ఉండనుంది. దర్శకుడు గౌతమ్‌ మేనన్‌ ప్రతినాయకుడిగా కనిపిస్తారు. ఇప్పటికే తొలి షెడ్యూల్‌ పూర్తయింది. త్వరలో రెండో షెడ్యూల్‌ ప్రారంభం కానుంది’’ అని దర్శక నిర్మాతలు తెలిపారు. ఈ తెలుగు, హిందీ, తమిళ్‌, కన్నడ,    మలయాళ భాషల్లో ఒకేసారి విడుదల కానుంది.