Hyderabad vs Lucknow: చెలరేగిన హెడ్‌, అభిషేక్‌.. హైదరాబాద్‌ అద్భుత విజయం

వారెవ్వా.. ఇది కదా మ్యాచ్‌ అంటే. బౌండరీల జోరు.. సిక్సర్ల హోరు.. బంతిపడితే చాలు బౌండరీ ఆవలకే అన్నట్లుగా సాగింది హైదరాబాద్‌ దూకుడు. ఈ మ్యాచ్‌ను ఎవరైనా చూడకపోతే అబ్బా ఎందుకు మిస్సయ్యామా అనుకోవాల్సిందే. 166 పరుగుల లక్ష్యాన్ని ఆ జట్టు ఓపెనర్లు ఊఫ్‌మని ఊదేశారు. కేవలం 9.4 ఓవర్లలోనే వికెటే కోల్పోకుండా ఛేదించి ఈ సీజన్‌లో ఏడో విజయాన్ని అందుకుని ప్లేఆఫ్స్‌కు మరింత చేరువైంది. 

హైదరాబాద్‌: సొంత గడ్డపై హైదరాబాద్ అద్భుతమైన విజయాన్ని అందుకుంది. లఖ్‌నవూను 10 వికెట్ల తేడాతో చిత్తుగా ఓడించి ప్లే ఆఫ్స్ అవకాశాలను మెరుగుపర్చుకుంది. తొలుత బ్యాటింగ్ చేసిన లఖ్‌నవూ 20 ఓవర్లలో 4 వికెట్ల నష్టానికి 165 పరుగులు చేసింది. ఈ లక్ష్యాన్ని సన్‌రైజర్స్‌ ఓపెనర్లరిద్దరే 9.4 ఓవర్లలోనే కరిగించేశారు. అభిషేక్ శర్మ (75*; 28 బంతుల్లో 8 ఫోర్లు, 6 సిక్స్‌లు), ట్రావిస్ హెడ్ (89*; 30 బంతుల్లో 8 ఫోర్లు, 8 సిక్స్‌లు) ఊచకోతతో ఉప్పల్ స్టేడియం బౌండరీలతో తడిసిముద్దయింది. హెడ్ 16 బంతుల్లో, అభిషేక్ 19 బంతుల్లో హాఫ్‌ సెంచరీలు అందుకున్నారు. వీరిద్దరి ధాటికి పవర్‌ ప్లేలోనే హైదరాబాద్‌ 107/0 స్కోరు చేసింది. అనంతరం కూడా ఈ జోడీ పట్టుసడలించకుండా మ్యాచ్‌ను వేగంగా ముగించేసింది.

అంతకుముందు టాస్‌ గెలిచి బ్యాటింగ్‌కు దిగిన లఖ్‌నవూ నిర్ణీత 20 ఓవర్లలో 4 వికెట్ల నష్టానికి 165 పరుగులు చేసింది. 64 పరుగులకే నాలుగు వికెట్లు కోల్పోయి కష్టాల్లో పడిన జట్టును ఆయుష్‌ బదోని (55*; 30 బంతుల్లో 9 ఫోర్లు), నికోలస్ పూరన్‌ (48*; 26 బంతుల్లో 6 ఫోర్లు, 1 సిక్స్‌) కీలక ఇన్నింగ్స్‌లు ఆడి జట్టును ఆదుకున్నారు. కెప్టెన్‌ రాహుల్‌ (29), కృనాల్‌ పాండ్య (24) ఫర్వాలేదనిపించారు. భువనేశ్వర్‌ (2/12) అద్భుతంగా బౌలింగ్ చేశాడు. కమిన్స్ ఒక వికెట్ పడగొట్టాడు.