Hyderabad vs Lucknow: ఐపీఎల్‌లో చరిత్ర సృష్టించిన హైదరాబాద్‌.. రికార్డుల మీద రికార్డులు

ఇంటర్నెట్ డెస్క్‌: సొంత గడ్డపై హైదరాబాద్ ఎప్పటికీ మరిచిపోలేని అద్భుతమైన విజయాన్ని అందుకుంది. లఖ్‌నవూను 10 వికెట్ల తేడాతో చిత్తుగా ఓడించి ప్లే ఆఫ్స్‌కు మరింత చేరువైంది. తొలుత బ్యాటింగ్ చేసిన లఖ్‌నవూ 20 ఓవర్లలో 4 వికెట్ల నష్టానికి 165 పరుగులు చేసింది. ఈ లక్ష్యాన్ని హైదరాబాద్‌ ఓపెనర్లిద్దరే 9.4 ఓవర్లలోనే ఉఫ్‌మని ఊదేశారు. ట్రావిస్ హెడ్ (89*; 30 బంతుల్లో 8 ఫోర్లు, 8 సిక్స్‌లు), అభిషేక్ శర్మ (75*; 28 బంతుల్లో 8 ఫోర్లు, 6 సిక్స్‌లు) ఊచకోతతో ఉప్పల్ స్టేడియం ఊర్రూతలూగింది. ఈ మ్యాచ్‌లో హైదరాబాద్‌ పలు రికార్డులు నమోదు చేసింది. వాటిపై ఓ లుక్కేద్దాం. 

• ఐపీఎల్ చరిత్రలో 160 కంటే పైచిలుకు స్కోరును అత్యంత వేగంగా ఛేదించిన తొలి జట్టుగా హైదరాబాద్‌ రికార్డు సృష్టించింది. 
• టోర్నీలో ఒక మ్యాచ్‌లో మొదటి 10 ఓవర్లలో అత్యధిక పరుగులు (167) చేసిన జట్టుగానూ అవతరించింది. తర్వాత రెండు స్థానాల్లోనూ (దిల్లీపై 158/4), (ముంబయిపై 148/2) హైదరాబాదే ఉంది. 
• ఒక సీజన్‌లో పవర్ ప్లేలో రెండుసార్లు 100 కంటే ఎక్కువ పరుగులు చేసిన తొలి జట్టుగా హైదరాబాద్ నిలిచింది. 
• ఒక ఐపీఎల్ ఎడిషన్‌లో అత్యధిక సిక్స్‌లు (146 సిక్సర్లు.. 12 మ్యాచ్‌ల్లో) బాదిన జట్టుగా హైదరాబాద్‌ ఆరెంజ్ ఆర్మీ రికార్డును సొంతం చేసుకుంది. 2018లో చెన్నై 145 సిక్స్‌లు.. 16 మ్యాచ్‌ల్లో పేరిట ఉన్న రికార్డును బ్రేక్ చేసింది. 
• ఈ సీజన్‌లో ఇప్పటివరకు అత్యధిక సిక్స్‌లు (35) బాదిన ఆటగాడిగా అభిషేక్ శర్మ రికార్డు నెలకొల్పాడు. 195 బంతుల్లోనే ఈ ఘనత అందుకున్నాడు. 
• ఒక ఐపీఎల్ సీజన్‌లో హైదరాబాద్‌ తరఫున అత్యధిక సిక్సర్లు బాదిన ఆటగాడు కూడా అభిషేక్ శర్మనే. 
• ఐపీఎల్‌ చరిత్రలో అత్యధిక బంతులు మిగిలుండగా (100 కంటే ఎక్కువ టార్గెట్ ఉన్న మ్యాచ్‌ల్లో) విజయం సాధించిన జట్టుగా హైదరాబాద్‌ రికార్డు సృష్టించింది. 
• ఐపీఎల్‌లో పవర్‌ ప్లేలో అత్యధిక సార్లు 50 కంటే ఎక్కువ స్కోర్లు చేసిన రెండో ఆటగాడిగా ట్రావిస్ హెడ్(4) నిలిచాడు. ఇవన్నీ అతడు ఈ సీజన్‌లో చేసినవే. డేవిడ్ వార్నర్ (6) తొలి స్థానంలో ఉన్నాడు.