Vicky Kaushal: షారుఖ్‌.. విక్కీ ఆటపాట

షారుఖ్‌ ఖాన్‌ హీరోగా రాజ్‌కుమార్‌ హిరాణి తెరకెక్కిస్తోన్న చిత్రం ‘డంకి’. తాప్సీ కథానాయిక. దేశాల మధ్య వలసల నేపథ్యంలో సాగే ఆసక్తికర కథాంశంతో రూపొందుతోంది. ఇందులో విక్కీ కౌశల్‌ ఓ కీలక పాత్రలో సందడి చేయనున్నారు. ప్రస్తుతం ముంబయిలో వేసిన ప్రత్యేక సెట్లో శరవేగంగా చిత్రీకరణ జరుపుకొంటోంది. ఆ సెట్‌లోనే ఇటీవల నాలుగు రోజుల పాటు షారుఖ్‌, విక్కీలపై ఓ వినోద భరిత గీతాన్ని తెరకెక్కించారు. దీనికి ప్రముఖ కొరియోగ్రాఫర్‌ గణేష్‌ ఆచార్య నృత్యరీతులు సమకూర్చారు. ఈ షెడ్యూల్‌ పూర్తి కాగానే మిగిలిన కీలక ఎపిసోడ్ల కోసం చిత్ర బృందం లండన్‌ బయలు దేరనుంది. దాని తర్వాత బుడాపెస్ట్‌లోనూ పలు సన్నివేశాలు చిత్రీకరించనున్నారు. ఈ విదేశీ షెడ్యూల్స్‌ జులైలో ప్రారంభం కానున్నట్లు ప్రచారం వినిపిస్తోంది. ఈ సినిమా వచ్చే ఏడాది డిసెంబర్‌ 22న ప్రేక్షకుల ముందుకు రానుంది.