రఘునందన్‌ బంధువుల ఇళ్లలో సోదాలు

సిద్దిపేట టౌన్‌: దుబ్బాక ఉప ఎన్నిక నేపథ్యంలో రెవెన్యూ, పోలీసు అధికారులు భాజపా అభ్యర్థి రఘునందన్‌రావు బంధువుల ఇళ్లలో సోదాలు నిర్వహించడం ఉద్రిక్తతకు దారితీసింది. రఘునందన్‌ రావు మామ రాంగోపాల్‌రావు, మరో బంధువు అంజన్‌ రావు ఇళ్లలో అధికారులు సోమవారం సోదాలు చేపట్టారు. ఈ సోదాల్లో అంజన్‌ రావు ఇంట్లో అధికారులకు రూ.18.67లక్షలు లభించాయి. 

ఈ సోదాలపై సమాచారం అందుకున్న భాజపా అభ్యర్థి రఘునందన్‌రావు, భాజపా శ్రేణులు అంజన్‌రావు ఇంటికి చేరుకుని పోలీసులతో వాగ్వాదానికి దిగారు. ఈ క్రమంలో పోలీసులు, భాజపా కార్యకర్తలకు మధ్య తోపులాట జరిగింది. ఈ తోపులాటలో రఘునందన్‌ సొమ్మసిల్లి కిందపడిపోయారు. అధికారులు స్వాధీనం చేసుకున్న నగదులో కొంత మొత్తాన్ని భాజపా శ్రేణులు లాక్కెళ్లాయి. ప్రస్తుతం ఆందోళన కొనసాగుతోంది. మరోవైపు తెరాసకు చెందిన సిద్దిపేట మున్సిపల్‌ ఛైర్మన్‌ రాజనర్సు ఇంట్లోనూ అధికారులు సోదాలు నిర్వహించారు.