BJP: జగన్‌ నొక్కే బటన్‌కు బ్యాటరీ ఇచ్చేది మోదీనే: జీవీఎల్‌

అమరావతి: ఏపీ ముఖ్యమంత్రి వైఎస్‌ జగన్‌ నొక్కే బటన్‌కు బ్యాటరీ ఇచ్చేది కేంద్ర ప్రభుత్వమేనని భాజపా ఎంపీ జీవీఎల్‌ నరసింహారావు అన్నారు. కేంద్రం అందిస్తున్న ఉచిత బియ్యాన్ని రాష్ట్ర ప్రభుత్వం లబ్ధిదారులకు పంపిణీ చేయాలంటూ ఈ నెల 14న కలెక్టరేట్ల వద్ద ధర్నా చేస్తామని జీవీఎల్‌ ప్రకటించారు. జగన్‌ను వైకాపా శాశ్వత అధ్యక్షుడిగా ఎన్నుకోవడం ప్రజాస్వామ్య వ్యవస్థకు ముప్పు అని విమర్శించారు. ‘‘ బటన్‌ నొక్కి నేరుగా నిధులు లబ్ధిదారుల ఖాతాల్లో వేస్తున్నామని పదే పదే చెబుతున్నారు. కానీ, బటన్‌ నొక్కడానికి బ్యాటరీ మోదీ ఇస్తున్నారని జగన్‌ ఎందుకు చెప్పడం లేదు. కేంద్రం నుంచి ఆర్థిక సాయం చేయకపోతే బటన్‌ పనిచేసేది కాదు. నరేంద్రమోదీకి పేరు వస్తుందేమోనని ఏప్రిల్‌ నుంచి రాష్ట్ర ప్రభుత్వం ఉచిత బియ్యం ఇవ్వడం ఆపేసింది. ధాన్యం సేకరించిన రైతులకు ఇంత వరకు బకాయిలు చెల్లించలేదు. కేంద్ర చెల్లిస్తే రాష్ట్ర ప్రభుత్వం ఎందుకు చెల్లించటం లేదు?’’ అని జీవీఎల్‌ ప్రశ్నించారు.