Guntur: షర్మిల పీసీసీ చీఫ్‌ అయ్యాక జగన్‌లో భయం మొదలైంది: ఆళ్ల

గుంటూరు: కాంగ్రెస్‌ పార్టీలో వైఎస్‌ షర్మిల రాక కొత్త ఉత్సాహాన్ని తెచ్చింది. గురువారం గుంటూరులో జరిగిన ర్యాలీ, పార్టీ సమావేశానికి భారీగా నాయకులు, కార్యకర్తలు తరలివచ్చారు. గతంలో పీసీసీ అధ్యక్షులు వచ్చినా 100 మందికి మించి హాజరయ్యేవారు కాదు. ఇవాళ వేలాది మంది షర్మిల కార్యక్రమానికి తరలివచ్చారు. వారిలో ఎక్కువ మంది మైనార్టీలు, ఎస్సీలు ఉన్నారు. గుంటూరు జిల్లాకు చెందిన ఎమ్మెల్యే ఆళ్ల రామకృష్ణారెడ్డి, మస్తాన్‌ వలి, లింగంశెట్టి ఈశ్వరరావు, కేంద్ర మాజీ మంత్రి జేడీ శీలం వంటి నాయకులు పాల్గొన్నారు.

ఆళ్ల రామకృష్ణారెడ్డి మాట్లాడుతూ.. షర్మిల పీసీసీ అధ్యక్షురాలు అయ్యాక జగన్‌లో భయం మొదలైందన్నారు. వైనాట్‌ 175 నుంచి ప్రజలు ఓడిస్తే ఇంట్లో కూర్చుంటామని సీఎం చేసిన వ్యాఖ్యలను ప్రస్తావించారు. మోసపూరిత వైకాపాను ఓడించి రాజశేఖర్‌రెడ్డి పాలన తెచ్చుకోవాలంటే కాంగ్రెస్‌కు ఓటేయాలని పిలుపునిచ్చారు. మాలమహానాడు అధ్యక్షులు గోళ్ల అరుణ్ కుమార్‌ షర్మిలను కలిసి వైకాపా పాలనలో దళితులపై జరుగుతున్న దాడులు, ఉప ప్రణాళిక నిధుల మళ్లింపు విషయంపై వినతిపత్రం ఇచ్చారు.