ఎమ్మెల్సీ ఓట్ల కోసం ఉపాధ్యాయులకు తాయిలాలు

అధికార పార్టీ తరఫున టిఫిన్‌ బాక్సుల పంపిణీ

అనంతపురం విద్య, న్యూస్‌టుడే: శాసనమండలి ఉపాధ్యాయ నియోజకవర్గ ఎన్నికల్లో ఓట్ల కోసం తాయిలాలు మొదలయ్యాయి. అధికార పార్టీ మద్దతుతో పోటీచేస్తున్న అభ్యర్థి తరఫున సోమవారం అనంతపురం జిల్లాలో బెళుగుప్ప, విడపనకల్లు, గుంతకల్లు, కంబదూరు మండలాల్లోని పాఠశాలలకు టిఫిన్‌ బాక్సులు పంపిణీ చేశారు. అభ్యర్థి తరఫున కొందరు వ్యక్తులు బడులు తెరవకముందే వచ్చి అక్కడి స్వీపర్లకు బ్యాగులు అందజేశారు. ఉపాధ్యాయులందరికీ ఇవ్వాలని చెప్పినట్లు సమాచారం. కరపత్రాలూ అందించారు. కొన్నిచోట్ల హెచ్‌ఎంలు వాటిని ఉపాధ్యాయులకు పంపిణీ చేయగా, మరికొన్నిచోట్ల తిరస్కరించారు. పట్టభద్రుల ఓట్ల కోసం అధికార పార్టీ తరఫున ప్రైవేటు ఉపాధ్యాయులకు డబ్బులు పంపిణీ చేస్తున్నట్లు విమర్శలు వస్తున్నాయి.