8న చలో దిల్లీ: ఆర్‌.కృష్ణయ్య

నల్లకుంట, న్యూస్‌టుడే: చట్టసభల్లో 50% రిజర్వేషన్లు కల్పించేందుకు పార్లమెంటులో బీసీ బిల్లు ప్రవేశపెట్టడం, బీసీ కుల గణన చేయాలనే డిమాండ్లతో డిసెంబరు 8న చలో దిల్లీ కార్యక్రమాన్ని చేపట్టినట్లు బీసీ సంక్షేమ సంఘం జాతీయ అధ్యక్షుడు ఆర్‌.కృష్ణయ్య తెలిపారు. వేల మంది బీసీలతో పార్లమెంటు వద్ద ప్రదర్శన చేపట్టనున్నట్లు చెప్పారు. హైదరాబాద్‌లో ఆదివారం జరిగిన తెలంగాణ, ఆంధ్రప్రదేశ్‌ బీసీ సంఘాల నాయకుల సమావేశంలో ఆయన మాట్లాడారు. డిసెంబరు 9, 10 తేదీల్లో కేంద్ర మంత్రుల నివాసాలను ముట్టడించనున్నట్లు పేర్కొన్నారు. బీసీ ఉద్యోగులకు పదోన్నతుల్లో రిజర్వేషన్లు కల్పించేందుకు రాజ్యాంగ సవరణ చేయాలని కోరారు. బీసీల ఉద్యమానికి నటుడు, దర్శక నిర్మాత ఆర్‌.నారాయణమూర్తి మద్దతు ప్రకటించారు. బీసీ సంక్షేమ సంఘం జాతీయ కన్వీనర్‌ గుజ్జ కృష్ణ ఆధ్వర్యంలో జరిగిన ఈ సమావేశంలో ఏపీ బీసీ సంఘాల నేతలు వెంగళరావు, నూకాలమ్మ, తెలంగాణ నేతలు నీల వెంకటేష్‌, జి.కృష్ణ, పగిళ్ల సతీష్‌ తదితరులు పాల్గొన్నారు.