Nara Lokesh: అభివృద్ధి చేయని ముఖ్యమంత్రుల జాబితాలో జగన్‌ది మొదటి స్థానం: లోకేశ్‌

అమరావతి: సొంత రాష్ట్రాన్ని అభివృద్ధి చేయని ముఖ్యమంత్రుల జాబితాలో జగన్ మొదటి స్థానంలో ఉంటారని తెదేపా జాతీయ ప్రధాన కార్యదర్శి నారా లోకేశ్‌ ఎద్దేవా చేశారు. ఏపీ అభివృద్ధిని గాలికి వదిలేసి అప్పులకుప్పగా మార్చారని ఆరోపించారు. ఎన్నికల ప్రచారంలో భాగంగా ఆయన గుంటూరు జిల్లా తాడేపల్లి మండలం పాలనుకొండలోని ఆర్ఆర్ అపార్టుమెంట్‌ వాసులతో సమావేశమై మాట్లాడారు. అధికారంలోకి రాగానే అమరావతి, పోలవరం పనులను పూర్తి చేస్తామని హామీ ఇచ్చారు. తెదేపా హయాంలో సుమారు 72 శాతం పోలవరం పనులను చేస్తే వాటిని ఇంతవరకు పూర్తి చేయలేకపోయారని తెలిపారు. అసలు పనులు ఎలా సాగుతున్నాయో ఎవరికీ తెలియడం లేదన్నారు. ఉద్యోగుల సీపీఎస్‌, ఓపీఎస్‌పై సమగ్రంగా అధ్యయనం చేస్తున్నామని.. తర్వాత వాటిపై మాట్లాడతామని తెలిపారు. అధికారంలోకి వచ్చిన వెంటనే దశలవారీగా ఉద్యోగులకు రావాల్సిన బకాయిలన్నీ అందిస్తామని చెప్పారు. సంక్షేమం, అభివృద్ధి లక్ష్యంగా పనిచేస్తామని లోకేశ్‌ తెలిపారు.