AP News: మద్య నిషేధం అన్నారు.. దానిపైనే రూ.లక్ష కోట్లు సంపాదించారు: బొండా ఉమా

అమరావతి: మద్య నిషేధంపై సీఎం జగన్‌ హామీ ఇచ్చి అదే మద్యంపై రూ.లక్ష కోట్లు సంపాదించారని తెదేపా నేత బొండా ఉమా విమర్శించారు. ఎన్టీఆర్ భవన్‌లో భాజపా నేత లంకా దినకర్‌, జనసేన నేత గాదె వెంకటేశ్వరరావుతో కలిసి ఆయన మీడియా సమావేశం నిర్వహించారు. జగన్ డబ్బు పిచ్చికి పేదలు బలైపోయారని ఆరోపించారు. కొత్త ప్రభుత్వం ఏర్పడిన వెంటనే దీనిపై కమిషన్ వేసి విచారణ జరిపిస్తామన్నారు. తప్పులు చేసిన అధికారులు కోర్టుల్లో నిలబడక తప్పదని హెచ్చరించారు.   

మద్యంపై జగన్‌కు ఆదాయం కిక్కు.. పేదల ప్రాణాలకు ముప్పు ఉందని భాజపా నేత లంకా దినకర్‌ అన్నారు. మద్యంలో రూ.లక్షల కోట్లు దోచేసి సూట్‌కేసు కంపెనీలకు తరలించారని ఆరోపించారు. మద్యం, గంజాయి రెండూ ఆయనకు ఆదాయ వనరులని విమర్శించారు. మేనిఫెస్టోను జగన్ తుంగలో తొక్కారని జనసేన నేత గాదె వెంకటేశ్వరరావు అన్నారు. మద్య నియంత్రణను తమ కూటమి సాధ్యం చేసి చూపిస్తుందని చెప్పారు.