ఉమ్మడి కుటుంబంలో కోడలికి ఆ హక్కేమీ ఉండదు!

అత్తవారింటిలో నివాసంపై దిల్లీ హైకోర్టు స్పష్టీకరణ

దిల్లీ: గృహహింస చట్టం కింద.. ఉమ్మడి కుటుంబంలో కోడలికి అజేయమైన నివాస హక్కేమీ ఉండదని దిల్లీ హైకోర్టు స్పష్టం చేసింది. వయోధికులైన అత్తమామలు శాంతియుతంగా జీవించడానికి గాను వారి అభీష్టం మేరకు ఆమె ఖాళీ చేసి వెళ్లిపోవాల్సి ఉంటుందని పేర్కొంది. భార్యతో విభేదాల వల్ల తన కుమారుడు వేరే ఇంటిలో ఉంటున్న నేపథ్యంలో.. కోడలు తన స్వార్జితమైన ఇంటిని ఖాళీ చేయాలంటూ ఆమె మామ 2016లో ఓ విచారణ న్యాయస్థానంలో వ్యాజ్యం దాఖలు చేశారు. ఈమేరకు అత్తవారింటిలో ఆమె నివసించే హక్కును నిరాకరిస్తూ విచారణ న్యాయస్థానం ఆదేశాలిచ్చింది. దీన్ని సవాల్‌ చేస్తూ ఆ కోడలు దిల్లీ హైకోర్టును ఆశ్రయించగా.. ఆమె వ్యాజ్యాన్ని హైకోర్టు తాజాగా కొట్టివేసింది. ఉమ్మడి కుటుంబానికి సంబంధించి కోడలిని ఖాళీ చేయమని చెప్పడానికి.. ఆస్తికి యజమానులైన వారిపై ఎలాంటి నిషేధం ఉండదని ఈ సందర్భంగా న్యాయమూర్తి జస్టిస్‌ యోగేశ్‌ ఖన్నా స్పష్టం చేశారు. అయితే తన కుమారుడు-కోడలి వివాహం చెల్లుబాటులో ఉన్నంతవరకు ఆమెకు ప్రత్యామ్నాయ నివాసం కల్పిస్తానని ఆమె మామ ఇచ్చిన హామీని పరిగణనలోకి తీసుకుంటూ.. అది సముచితమేనని పేర్కొన్నారు. ఈ కేసులో సీనియర్‌ సిటిజన్లు అయిన అత్తమామలు శాంతియుత జీవనం సాగించే యోగ్యత కలవారని, కుమారుడు-కోడలు మధ్య గొడవలు వారిని బాధించరాదని వ్యాఖ్యానించారు.