కష్టాల్లో కివీస్‌

లీడ్స్‌: ఇప్పటికే టెస్టు సిరీస్‌ను కోల్పోయిన న్యూజిలాండ్‌.. నామమాత్రమైన మూడో టెస్టులో ఇంగ్లాండ్‌ ముందు మెరుగైన లక్ష్యాన్ని నిలిపేందుకు పోరాడుతోంది. తొలి ఇన్నింగ్స్‌లో 31 పరుగుల ఆధిక్యాన్ని కోల్పోయిన ఆ జట్టు.. రెండో ఇన్నింగ్స్‌లో మూడో రోజు ఆట ఆఖరుకు 168/5తో నిలిచింది. లేథమ్‌ (76), విలియమ్సన్‌ (48) రెండో వికెట్‌కు 97 పరుగులు జోడించడంతో ఒక దశలో 125/1తో పటిష్ట స్థితిలో నిలిచిన కివీస్‌.. పాట్స్‌ (2/20) సహా ఇంగ్లాండ్‌ బౌలర్లు విజృంభించడంతో 36 పరుగుల తేడాలో 4 వికెట్లు కోల్పోయి కష్టాల్లో పడింది. ఆట ఆఖరుకు మిచెల్‌ (4), బ్లండెల్‌ (5) క్రీజులో ఉన్నారు. అంతకుముందు 264/6తో తొలి ఇన్నింగ్స్‌ను కొనసాగించిన ఇంగ్లాండ్‌.. 360 పరుగులకు ఆలౌటైంది. జేమీ ఒవర్టన్‌ (97) సెంచరీ ముంగిట ఔటైపోగా.. బెయిర్‌స్టో 162 పరుగులు చేసి తొమ్మిదో వికెట్‌ రూపంలో వెనుదిరిగాడు. బ్రాడ్‌ (42) విలువైన పరుగులు చేశాడు.