Published : 30 Jun 2022 02:35 IST

ప్రిక్వార్టర్స్‌లో సింధు, కశ్యప్‌

సైనా ఓటమి

కౌలాలంపూర్‌: మలేసియా ఓపెన్‌ ప్రపంచ టూర్‌ సూపర్‌ 750 టోర్నీలో భారత స్టార్‌ షట్లర్‌ పి.వి.సింధు ప్రిక్వార్టర్‌ఫైనల్లోకి దూసుకెళ్లింది. బుధవారం మహిళల సింగిల్స్‌ తొలి రౌండ్లో ఏడో సీడ్‌ సింధు 21-13, 21-17తో పోర్న్‌పావీ చోచువాంగ్‌ (థాయ్‌లాండ్‌)పై విజయం సాధించింది. ఇటీవల ఇండోనేసియా ఓపెన్‌లో తొలి రౌండ్లోనే ఓడిన సింధు.. మలేసియా టోర్నీని కసిగా ప్రారంభించింది. 40 నిమిషాల పోరులో మొదటి గేమ్‌ ఏకపక్షంగా సాగింది. 8-2తో గేమ్‌ను ఆరంభించిన సింధు కొద్దిసేపటికే 16-13తో ముందంజ వేసింది. స్మాష్‌లు, క్రాస్‌కోర్ట్‌ షాట్‌లతో పాయింట్ల వేట కొసాగించిన సింధు 21-13తో తొలి గేమ్‌ను సొంతం చేసుకుంది. రెండో గేమ్‌లో పోర్న్‌పావీ పోరాడింది. 4-2తో ఆధిక్యం సంపాదించిన ప్రత్యర్థి 13-8తో మరింత ముందుకెళ్లింది. సింధు అనవసర తప్పిదాలు ప్రత్యర్థికి లాభించాయి. దీంతో పోర్న్‌పావీ 16-10తో రెండో గేమ్‌ దిశగా పయనించింది. అయితే షటిల్‌పై నియంత్రణ తెచ్చుకున్న సింధు వరుసగా 5 పాయింట్లు గెలుచుకుని 15-16తో పోర్న్‌పావీని సమీపించింది. ప్రత్యర్థి సైతం 2 పాయింట్లు నెగ్గి 17-15తో గేమ్‌కు చేరువైంది. మరోసారి విజృంభించిన సింధు వరుసగా 6 పాయింట్లతో మ్యాచ్‌కు తెరదించింది. 21-17తో రెండో గేమ్‌ను కైవసం చేసుకుంది. పోర్న్‌పావీపై తన గెలుపోటముల రికార్డును 6-3తో మరింత మెరుగు పరుచుకుంది. ప్రిక్వార్టర్స్‌లో ఫిటయపోర్న్‌ చైవాన్‌ (థాయ్‌లాండ్‌)తో సింధు తలపడనుంది. మరో స్టార్‌ షట్లర్‌ సైనా నెహ్వాల్‌ పోరాటం తొలి రౌండ్లోనే ముగిసింది. సైనా 11-21, 17-21తో ఐరిస్‌ వాంగ్‌ (అమెరికా) చేతిలో ఓడింది. పురుషుల సింగిల్స్‌లో పారుపల్లి కశ్యప్‌ ప్రిక్వార్టర్స్‌ చేరుకున్నాడు. తొలి రౌండ్లో కశ్యప్‌ 21-12, 21-17తో క్వాంగ్‌ హీ (కొరియా)పై గెలుపొందాడు. ప్రిక్వార్టర్స్‌లో కున్లావుత్‌ వితిద్సర్న్‌ (థాయ్‌లాండ్‌)తో కశ్యప్‌ పోటీపడతాడు. మిక్స్‌డ్‌ డబుల్స్‌ తొలి రౌండ్లో సుమీత్‌రెడ్డి- అశ్విని పొన్నప్ప 15-21, 21-19, 17-21తో రాబిన్‌- సెలెనా (నెదర్లాండ్స్‌) చేతిలో పోరాడి ఓడారు. మహిళల డబుల్స్‌ తొలి రౌండ్లో అశ్విని- శిఖ 11-21, 14-21తో మత్సుమొటొ- నగహర (జపాన్‌) చేతిలో పరాజయం చవిచూశారు.

Read latest Sports News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని

సుఖీభవ

మరిన్ని