సూర్యను కొనేంత డబ్బు లేదు

దిల్లీ: టీమ్‌ఇండియా ఆటగాళ్లకు విదేశీ లీగ్‌ల్లో ఆడేందుకు అనుమతి లేదు. ఒకవేళ బీసీసీఐ సరేనంటే సూర్యకుమార్‌ను ఆస్ట్రేలియా బిగ్‌బాష్‌ లీగ్‌లో ఆడించే అవకాశం ఉంటుందా? అని అడిగిన ప్రశ్నకు మ్యాక్స్‌వెల్‌ ఆసక్తికరమైన జవాబిచ్చాడు. సూర్యను కొనేంత డబ్బు తమ దగ్గర లేదని చెప్పాడు. ‘‘మా దగ్గర సరిపడా డబ్బు లేదు. సూర్యను కొనలేం. లీగ్‌లోని ప్రతి క్రికెటర్‌, క్రికెట్‌ ఆస్ట్రేలియా కాంట్రాక్టు ఆటగాళ్లనూ తొలగించి ఆ డబ్బును సూర్యకు ఇవ్వాలి’’ అని అతను చెప్పాడు. క్రీజులో త్వరగా కుదురుకుని, ఖాళీల మధ్య బంతిని పంపడమే అంతర్జాతీయ క్రికెట్లో సూర్య విజయవంతమవడానికి కారణమని మ్యాక్సీ అభిప్రాయపడ్డాడు. ‘‘ఫీల్డింగ్‌లో ఖాళీలను సూర్య గొప్పగా ఉపయోగించుకుంటాడు. అతను వేగంగా మణికట్టును తిప్పడంతో పాటు చేతిని వాడతాడు. దీంతో చివరి క్షణంలో కూడా సర్దుబాటు చేసుకుని షాట్లు ఆడగలుగుతున్నాడు. తొలి నాలుగైదు బంతుల్లోనే అతను ఎదురు దాడికి దిగి బౌలర్లపై ఒత్తిడి పెంచాలనుకుంటాడు. అప్పుడే అతణ్ని ఔట్‌ చేయలేకపోతే ఇక వికెట్‌ తీయడం కష్టమే. స్పిన్‌ బౌలింగ్‌లో కవర్స్‌లో ఉత్తమంగా షాట్లు కొడతాడు. స్వీప్‌, రివర్స్‌ స్వీప్‌, స్ట్రెయిట్‌.. ఇలా అన్ని షాట్లు ఆడతాడు. మైదానం నలువైపులా బలంగా షాట్లు కొట్టడం నమ్మశక్యం కానిదే. పేసర్‌ వేగంతో బంతి వేస్తే.. వెంటనే క్రీజులో కదిలి ఫైన్‌లెగ్‌ దిశగా సిక్సర్‌గా మలుస్తాడు’’ అని అతను పేర్కొన్నాడు.