విజృంభించిన స్టార్క్‌, కమిన్స్‌

వెస్టిండీస్‌ 283 ఆలౌట్‌

పెర్త్‌: వెస్టిండీస్‌తో తొలి టెస్టుపై ఆస్ట్రేలియా పట్టు మరింత బిగిసింది. స్టార్క్‌ (3/51), కమిన్స్‌ (3/34) విజృంభించడంతో విండీస్‌ను తొలి ఇన్నింగ్స్‌లో 283 పరుగులకే ఆలౌట్‌ చేసిన కంగారూ జట్టు 315 పరుగుల ఆధిక్యాన్ని సొంతం చేసుకుంది. ఓవర్‌నైట్‌ స్కోరు 74/0తో రెండో రోజు, శుక్రవారం తొలి ఇన్నింగ్స్‌ కొనసాగించిన కరీబియన్‌ జట్టు.. కాసేపటికే తేజ్‌ నారాయణ్‌ చందర్‌పాల్‌ (51) వికెట్‌ కోల్పోయింది. బోనర్‌ (16) కూడా ఎక్కువసేపు నిలవలేదు. ఈ స్థితిలో కెప్టెన్‌ క్రెయిగ్‌ బ్రాత్‌వైట్‌ (64), బ్లాక్‌వుడ్‌ (36)తో కలిసి విండీస్‌ ఇన్నింగ్స్‌ను ముందుకు తీసుకెళ్లాడు. బ్రాత్‌వైట్‌ వెనుదిరిగినా.. హోల్డర్‌ (27), బ్రూక్స్‌ (33)తో కలిసి బ్లాక్‌వుడ్‌ విలువైన భాగస్వామ్యాలు నెలకొల్పవడంతో విండీస్‌ ఓ మోస్తరు స్కోరు చేయగలిగింది. ఒక దశలో 245/4తో మెరుగైన స్థితిలో ఉన్న కరీబియన్‌ జట్టు.. స్టార్క్‌, కమిన్స్‌, లైయన్‌ (1/35) ధాటికి 38 పరుగుల తేడాతో 6 వికెట్లు కోల్పోయి 300ల్లోపు స్కోరుకే పరిమితమైంది. విండీస్‌కు ఫాలోఆన్‌ ఇవ్వకుండా రెండో ఇన్నింగ్స్‌ ప్రారంభించిన ఆసీస్‌ ఆట చివరికి 29/1తో నిలిచింది. ఖవాజా (5) ఔట్‌ కాగా.. వార్నర్‌ (18), లబుషేన్‌ (3) క్రీజులో ఉన్నారు. ఆసీస్‌ తొలి ఇన్నింగ్స్‌లో 598/4 వద్ద డిక్లేర్‌ చేసిన సంగతి తెలిసిందే.