ప్రగతిభవన్‌ ముట్టడికి వంట కార్మికుల యత్నం

సోమాజిగూడ, న్యూస్‌టుడే: వేతనం పెంచాలని డిమాండ్‌ చేస్తూ సర్కారు బడుల్లో మధ్యాహ్న భోజనం తయారు చేసే వంట కార్మికులు శుక్రవారం ప్రగతిభవన్‌ ముట్టడికి యత్నించారు. వివిధ జిల్లాల నుంచి విడతలుగా తరలి వచ్చిన కార్మికులను పోలీసులు అరెస్టు చేసి పంజాగుట్ట, ఎస్‌.ఆర్‌.నగర్‌ ఠాణాలకు తరలించారు. ఈ సందర్భంగా తెలంగాణ ప్రభుత్వ పాఠశాలల మధ్యాహ్న భోజన వంట కార్మికుల సంఘం నేతలు బాబాయి, మంజుల, దేవరమ్మ, సరోజ తదితరులు మాట్లాడుతూ.. 14 ఏళ్లుగా బడుల్లో వంట చేస్తున్నామని, గౌరవ వేతనం రూ.1000 మాత్రమే ఇస్తున్నారని వాపోయారు. ఇతర పనులకు వెళ్తే రోజుకు రూ.350 వస్తుందని చెప్పారు. అన్ని రంగాల ఉద్యోగులు, ప్రజాప్రతినిధులకు వేతనాలు పెంచుతున్న ప్రభుత్వం తమను విస్మరిస్తోందన్నారు.