Twitter: ట్వీట్లు స్క్రీన్‌షాట్ తీయొద్దంటున్న ట్విటర్‌.. కారణం ఇదేనా!

ఇంటర్నెట్‌ డెస్క్‌:  ట్విటర్‌లో  ఏదైనా ట్వీట్‌ నచ్చితే ఇతరులు చూసేందుకు రీట్వీట్ చేస్తాం. ఒకవేళ వ్యక్తిగతంగా స్నేహితులు, బంధువులతో షేర్‌ చేసుకోవాలంటే స్క్రీన్‌షాట్‌ తీసి వారికి పంపుతాం. తాజా సమాచారం ప్రకారం ట్వీట్లు స్క్రీన్‌ షాట్లు తీయొద్దని ట్విటర్‌ యూజర్లను కోరుతుందట. దానికి బదులు ట్వీట్‌ షేర్‌ లేదా ట్వీట్‌ లింక్‌ కాపీ చేసుకోమని సూచిస్తుందని పలువురు టెక్‌ టిప్‌స్టర్లు తెలిపారు. ప్రస్తుతం ఈ సూచన కొద్దిమంది ట్విటర్‌ యూజర్లకు మాత్రమే కనిపిస్తుంది. ట్విటర్‌ను యూజర్లకు మరింత చేరువచేసేందుకు షేర్‌ ట్వీట్‌ (Share Tweet) , కాపీ లింక్‌ (Copy Link) ఫీచర్లను తీసుకొస్తున్నట్లు సమాచారం. 

‘‘రోజూ ట్విటర్‌ నుంచి ఇతర ఫ్లాట్‌ఫామ్‌లలోకి కొన్ని మిలియన్ల ట్వీట్లు షేర్ అవుతుంటాయి. వాటిని యూజర్లకు సులువుగా చేరువచేసేందుకు షేర్ ట్వీట్‌, కాపీ లింక్‌ ఫీచర్లను తీసుకొస్తున్నాం. యూజర్లు స్క్రీన్‌షాట్‌కు బదులు, ట్వీట్‌ షేర్‌ లేదా లింక్‌ కాపీ చేసి షేర్‌ చేస్తే ట్విటర్‌ ఖాతా లేని వ్యక్తులు సైతం వాటిపై క్లిక్ చేస్తారు. దీంతో వారు కూడా ట్విటర్‌ ఖాతా ఓపెన్‌ చేసేందుకు ఆసక్తి వ్యక్తపరుస్తారు. ప్రస్తుతం ఈ ఫీచర్‌ను ఐఓఎస్‌ బీటా యూజర్ల ద్వారా పరీక్షిస్తున్నాం. త్వరలోనే పూర్తిస్థాయిలో యూజర్లకు అందుబాటులోకి తీసుకొస్తాం’’ అని ట్విటర్‌ అధికార ప్రతినిధి ఒక టెక్‌ వార్తా సంస్థకు తెలిపారు. 

ఖాతాలేనివారు కూడా ట్విటర్‌ ఉపయోగించుకునేలా కొత్త ఫీచర్‌ను గత నెల రోజులుగా ట్విటర్‌ పరీక్షిస్తోంది. ఈ ఫీచర్‌తో ట్విటర్ ఖాతాలేని వారు కూడా ట్వీట్లు చేయడంతోపాటు 50 మందిని ఫాలో కావచ్చు. కానీ, వారికి రీట్వీట్‌, లైక్‌ ఫీచర్లు పనిచేయవు. ట్వీట్‌ ఎడిట్‌ బటన్‌ను కూడా ట్విటర్‌ తీసుకొస్తుంది. ట్వీట్‌ చేసిన తర్వాత అందులో ఏవైనా మార్పులు చేయాలనుకుంటే యూజర్‌ ట్వీట్‌ను ఎడిట్ చేయెచ్చు. ప్రస్తుతం ఈ ఫీచర్‌ అమెరికాలో ఐఓఎస్‌ యూజర్లకు అందుబాటులో ఉంది. త్వరలోనే ఈ ఫీచర్‌ను అన్ని ప్రాంతాల్లోని యూజర్లకు పరిచయం చేస్తామని ట్విటర్‌ తెలిపింది.