ఈడీ లేఖపై ఏం చర్యలు తీసుకున్నారు!

భూదాన్‌ భూముల వ్యవహారంలో మహేశ్వరం పోలీసుల వివరణ కోరిన హైకోర్టు

ఈనాడు, హైదరాబాద్‌: రంగారెడ్డి జిల్లా మహేశ్వరం మండలం నాగారంలోని భూదాన్‌భూముల వ్యవహారంలో అవకతవకలు, రికార్డుల తారుమారు జరిగినట్లుందని, దీనిపై పరిశీలించాలంటూ ఈడీ రాసిన లేఖపై ఏం చర్యలు తీసుకున్నారో చెప్పాలంటూ మహేశ్వరం పోలీసులకు హైకోర్టు ఆదేశాలు జారీచేసింది. భూదాన్‌ భూముల్లో రికార్డులు మార్చారని, మోసపూరిత చర్యలకు పాల్పడ్డారని ఈడీ లేఖ రాసినా పోలీసులు చర్యలు తీసుకోకపోవడాన్ని సవాల్‌చేస్తూ సర్వేనం.181లో భూమి ఉన్న దస్తగిరి షరీఫ్‌ హైకోర్టులో పిటిషన్‌ దాఖలు చేశారు. దీనిపై జస్టిస్‌ ఎన్‌.వి.శ్రవణ్‌కుమార్‌ సోమవారం విచారణ చేపట్టారు. పిటిషనర్‌ తరఫు న్యాయవాది వాదనలు వినిపిస్తూ..2024లో మహేశ్వరం డీసీపీకి ఈడీ లేఖ రాసిందన్నారు. తప్పుడు పత్రాలను సృష్టించారని, ఫోర్జరీలు చేశారని, రెవెన్యూ రికార్డులు తారుమారు చేశారని విచారణలో తేలిందని, దీనిపై విచారించాలంటూ ఈడీ లేఖ రాసిందన్నారు. విచారణ జరిపి ఇంతవరకు చర్యలు తీసుకోకపోవడంతో కోర్టును ఆశ్రయించినట్లు తెలిపారు. వాదనలను విన్న న్యాయమూర్తి పోలీసుల వివరణ కోరుతూ విచారణను వారానికి వాయిదా వేశారు.