పీర్‌ షబ్బీర్‌ సేవలు మరువలేనివి: సీఎం రేవంత్‌రెడ్డి

మాజీ ఎమ్మెల్సీ కుటుంబసభ్యులతో మాట్లాడుతున్న సీఎం రేవంత్‌రెడ్డి. చిత్రంలో కిచ్చెన్నగారి లక్ష్మారెడ్డి తదితరులు

పహాడీషరీఫ్, న్యూస్‌టుడే: ఇటీవల మృతి చెందిన మాజీ ఎమ్మెల్సీ మౌలానా హఫీజ్‌ పీర్‌ షబ్బీర్‌ కుటుంబాన్ని ముఖ్యమంత్రి రేవంత్‌రెడ్డి పరామర్శించారు. రంగారెడ్డి జిల్లా జల్‌పల్లి పురపాలిక షాహిన్‌నగర్‌ మర్కజ్‌ సమీపంలోని ఆయన నివాసానికి సోమవారం రాత్రి వెళ్లిన ముఖ్యమంత్రి... ఉమ్మడి ఆంధ్రప్రదేశ్‌లో పీర్‌ షబ్బీర్‌ చేసిన సేవలు మరువలేనివని కొనియాడారు. ఆయన మృతి తీరని లోటుని ముస్లిం మతపెద్దల వద్ద ఆవేదన వ్యక్తంచేశారు. ముఖ్యమంత్రిగానే కాకుండా వ్యక్తిగతంగానూ వారి కుటుంబానికి అండగా ఉంటానని హామీ ఇచ్చారు. కాంగ్రెస్‌ నాయకులు, కార్యకర్తలు అధిక సంఖ్యలో తరలివచ్చారు. దీంతో శ్రీశైలం రహదారిపై ట్రాఫిక్‌ నిలిచిపోయింది. ముఖ్యమంత్రి వెంట మాజీ ఎమ్మెల్యే కిచ్చెన్నగారి లక్ష్మారెడ్డి ఉన్నారు.