బాలల ఆరోగ్య పరీక్షలకు సరికొత్త యాప్‌

ఈనాడు, హైదరాబాద్‌: పిల్లల్లో మానసిక, శారీరక ఎదుగుదలను పక్కాగా అంచనా వేసి ప్రాథమిక దశలోనే చికిత్స అందించేందుకు కుటుంబ ఆరోగ్య సంక్షేమశాఖ కమిషనరేట్‌ రాష్ట్రంలో సరికొత్త యాప్‌ను సిద్ధం చేసింది. పైలట్‌ ప్రాజెక్టుగా వికారాబాద్‌ జిల్లాలోని కొన్ని అంగన్‌వాడీ కేంద్రాల్లో ఈ యాప్‌ ద్వారా రాష్ట్రీయ బాల్‌ స్వాస్థ్య కార్యక్రమ్‌(ఆర్‌బీఎస్‌కే) బృందాలు పరీక్షలు చేయనున్నాయి. నెలల వయసు నుంచి ఆరేళ్ల వరకు బాలల ఎదుగుదల తీరును ఈ యాప్‌లోని డేటా సహకారంతో సేకరిస్తారు. ఏ వయసులో పిల్లలు ఎలా ఉండాలో ఇందులో సవివరంగా ఉంటుంది. వాటి ఆధారంగా ఆరోగ్య పరీక్షలు చేసి పిల్లలకు అవసరమైన చికిత్సలు అందిస్తారు. తర్వాత దశలో పాఠశాలల పిల్లలకు కూడా ఈ యాప్‌ ద్వారానే ఆరోగ్య పరీక్షలు చేసి డిజిటల్‌ హెల్త్‌కార్డులతో అనుసంధానం చేయాలని యోచిస్తున్నారు.