పత్తి రైతుల సమస్యలు పరిష్కరించాలి

సీసీఐకి మంత్రి కోమటిరెడ్డి వినతి

ఈనాడు, హైదరాబాద్‌: తెలంగాణ పత్తి రైతుల సమస్యలు పరిష్కరించాలని కాటన్‌ కార్పొరేషన్‌ ఆఫ్‌ ఇండియా(సీసీఐ) సీఎండీ లలిత్‌కుమార్‌ గుప్తాకు రాష్ట్ర రోడ్లు, భవనాల శాఖ మంత్రి కోమటిరెడ్డి వెంకట్‌రెడ్డి విజ్ఞప్తి చేశారు. ఈ మేరకు మంగళవారం ముంబయిలో సీసీఐ సీఎండీకి.. జడ్చర్ల ఎమ్మెల్యే అనిరుధ్‌రెడ్డితో కలిసి మంత్రి వినతిపత్రం సమర్పించారు. ‘పత్తి తేమ శాతాన్ని 14 వరకు సడలించాలి. మద్దతు ధరను పెంచాలి. కొనుగోలు కేంద్రాలు పెంచి ప్రైవేటు వ్యాపారుల దోపిడీని అరికట్టాలి. తెగుళ్లు, అకాల వర్షాలతో నష్టపోయిన రైతులకు ప్రత్యేక ప్యాకేజీ అందించాలి. రైతులకు చెల్లించాల్సిన బకాయిలను వెంటనే విడుదల చేయాలి’ అని కోమటిరెడ్డి విజ్ఞప్తి చేశారు.